Shillong, Naitung 17: Ka BJP Meghalaya ha ka sngi palei ka la rakhe kynmaw burom ïa ka lyngkhuh sngi khlad ba 190 snem jong u Tirot Sing Syiem uba la ïakhun laitluid bad uba la tbeh ka jingshai bad uba la wanrah ka jingsngew sarong ïa ka jaitbynriew Khasi.
Ha kane ka sngi kynmaw burom ïa ka jingkhlad noh U Tirot Sing Syiem, na ka liang ka BJP ka la pynlong ïa kiba bun ki prokram ha kylleng ka nongbah Shillong bad ka jylla hi baroh kawei.
Ha ka step jong ka sngi Palei, ka kyhun jong ki dkhot ka BJYM ba la ïalam da u President u Bah Mewaker Lyngdoh bad u state Vice President u Bah Khrawboklang Basaiawmoit ki la buh ruh ïa ki syntiew hakhmat ka dur mot jong une u nongïaleh laitluid hapoh ka State Central Library.
Ha ka janmiet pat, la pynlong ïa ka prokram kaba lyngkot hapoh ka head office jong ka party, ha kaba ïa ka jingleh burom bad buh syntiew la ïalam da u President u Rikman G Momin ha ka jingïadonlang ki nongïalam ba hakhmat jong ka party.
Ha kane ka sngi ka BJP Meghalaya ka la shim ruh ka rai ban kyrpad ïa ka sorkar pdeng ba kan ai ka jingithuh kaba kyrpang ïa une u nongïaleh laitluid bad ba dei ban pynbna paidbah ïa baroh ki kam ba u la leh ha kylleng ka ri baroh kawei.
U Nongaiktien ka BJP u Bah Mariahom Kharkrang u la ong ba ka BJP kan ïaibteng ban burom ïa baroh kito kiba la ïakhun ban ïaleh laitluid na Meghalaya khnang ban pynthikna ba ki kam jong ki kin bteng ban ai mynsiem ïa baroh ka pateng jong ka jylla bad ka ri baroh kawei.
