Yn kyrpad ïa ka Sorkar Pdeng ban ym pynhap ïa ki nongtih par juk hyndai ha ka thup tih marpohkhyndew

Shillong, Lber 10 : U Myntri Rangbah ka jylla u Conrad K Sangma ha ka sngi Nyngkong u la ong ba ka Sorkar ka la shimkhia ban ïa kren bad ka sorkar pdeng ban ailad bad pynbna ba ka jingtih par da rukom ba ju leh ha ki por hyndai ba kan ym hap ha ka thup tih marpoh khyndew.
Haba jubab halor ka jingkylli ba wanrah da u MLA ka Mawryngkneng, halor ka ishu tih maw shyiap ha ka jylla na ka liang u Myntri Rangbah u la ong, “Ngi dang ïakhun ban ïoh jingbit na ka Sorkar Pdeng ban ailad ïa ngi ban pynbna ba ka jingtih par da ka rukom tih hyndai ba kan ym hap ha ka thup tih marpoh khyndew.
U Myntri Rangbah u la pyntip ruh ba ka sorkar jylla ka la thaw da ka komiti ban bishar bniah halor ka Meghalaya Minor Mineral Concession Rules (MMMCR), 2016 hadien ba bun ki dkhot jong ka Iing Dorbar ki la pynsngew halor ka jingshah ktah ki nongtih par kiba rit kiba dang bteng ïa ka rukom tih par kaba ju leh naduh hyndai ha ka jylla.
“Ngi la sngewthuh ba ki nongtih par kiba rit, kiba dang bteng da ka rukom tih hyndai, ba ka kam ba ki leh ka long beit tang ban pyndap ïa ka jingdonkam ha ki shnong ki thaw lajong lane ki jingtrei kam kiba rit. Kumta, hadien ba ngi la ïakynduh bad ki dkhot, ngi la ïakren bniah bad u Symbud Myntri Rangbah bad ngi la thaw ïa ka komiti ha ka 16 tarik u Naiwieng, 2024 ha kaba ngi la don ki MLA bad ki ophisar na ka tnad Mining & Geology bad Forest Department badkumjuh na ki riew paidbah khamtam eh ki nongtih par bad ki nongmihkhmat kum ki dkhot,” u la bynrap shuh shuh.
U Myntri Rangbah u la pyntip ruh ba haduh mynta ar tylli ki jingïalang ki la dep ban shong bad la shim ruh ïa ki rai ba baroh ki kyndon treikam na ka bynta ban ïoh ïa ki jingbit ban leh ïa ki kam tih par ha ka rukom tih hyndai ki dei ban long kiba suk.
“Da kaba pynshong nongrim ïa kata, ka komiti ka la ai jingmut ba dei ban donkam tang katto katne ki kot donkam, kata ka forest clearance ban pyntikna ba kam dei ka jaka khlaw bad ruh ka No – Objection Certificate na u Rangbah Shnong ban pyntikna ba ka jinglong trai ïa ka jaka kam dei satia kaba don hapdeng ka jingïaknieh lane don ha ka mukotduma.”
Shuh shuh u ong ruh ba kane ka jingai jingmut ka la poi sha ka sorkar jylla bad ka sorkar ruhka don mynta ha ka jingpynkhreh ban ïoh ïa ka jingmynjur na ka sorkar India ban ailad ïa ngi ban weng noh ïa ki kyndon ba la buh naba kine ki par ki dei kiba rit bad ba ki don ruh ka kyndon ban aplai na ka bynta ban lait na ki kyndon jong ka Environment Protection Act 1986…” u la ong .
U Myntri Rangbah u ong ruh ba kum ka sorkar ki trei shitom naba bun na ki nongtih par kiba rit ki la kynduh jingeh naba ki donki kyndon hapoh ka Rules jong katei ka Act kaba kum ki nongtih par ki kynduh jingeh ba bud.
Shwa kane, u Myntri Rangbah u la pyntip ruh ba ka jingtih maw tih shyiap ha ka jylla Meghalaya kadei kaba la teh kyndon katkum ki kyndon jong ka Meghalaya Minor Mineral Concession Rules, 2016 kumba la pynbeit haduh mynta mynne, kaba long katkum ka Section 15 jong ka Mines and Minerals (Development and Regulation) Act, 1957 (Central Act No 67 of 1957).
Shuh shuh u ong ba ka jingshyiap la peit katkum ki kyndon jong ka Sustainable Sand Mining Management Guidelines, 2016 bad kaEnforcement & Monitoring guidelines for Sand Mining, 2020, ïa kaba la pynbna da ka Ministry of Environment, Forests & Climate Change.