Yn kyrhun u sing ha Ri Bhoi kop ki Nongïalam ka HSPDP ba wan pynïasoh ki briew ka NPP bad MCPC

Nongpoh, Ïaiong 29: Ki nongïalam ka HSPDP ka jylla kila kop ba u sing un sa kyrhuh haka them Ri-Bhoi ha kane ka elekshon ban wan hadien ba naka liang ka party kala pdiang burom ïa kumba 50 ngut ki nongkyrshan bad nongïalam naka party NPP bad MCPC bad kiwei kiwei kiba la pynïasoh ïalade mynta ka sngi haka jingïalang kaba la long ha Umsning Auditorium.
Ha katei ka jingïalang pdiang burom ïa ki dkhot na kiwei kiwei ki party sha ka party HSPDP ha Ri-Bhoi la sakhi ruh da ka jingdonlang u Bah KP Pangniang President ka HSPDP haka jylla, Samla Sandondor Ryntathiang President Youth Wing ka jylla, Bah PB Sylliang President ka HSPDP Ri-Bhoi, Bah Khraw Marweiñ General Secretary bad kiwei kiwei bad ha katei ka sngi uwei naki ophias IAS ba shongthaid u Bah CC Mihsil u la leit ban pynïasoh ïalade bad katei ka party.
Haba kren ha katei ka sngi naka liang u Bah KP Pangniang President ba rangbah u la pynpaw ka jingsngewkmen kaba khraw halor katei ka jingpynïasoh jong ki nongïalam naka party NPP, Mawhati Constituency Political Committee (MCPC) kaba long ka jingshngaiñ bad ka jingioh mynsiem ïaka party baroh kawei kiba dei naka thaiñ Umsning bad Mawhati.
U la ong ruh baka party HSPDP ka dei ka party kaba la rim tam haka jylla kaba don ka nongrim kaba skhem haka jingtreikam kaba la pynmih ruh shibun ki soh bad ki nongïalam haka jylla kaba trei ruh naka bynta ki trai ri trai muluk, namar kumba long mynta ka jylla kala don haka jingma kaba khraw ba ki trai shnong kim long trai ïala ka khyndew bad ka spah da kaba ai nuksa ruh ïaki mar poh khyndew bun bala kheiñ beaiñ lada shalan ïaki kum u dewiong, ki maw, ki shyiap bad donkam ka jingmynjur naka sorkar pdeng bad kane ka long kaei kaei ka bym lah ban pdiang namar ki mar poh khyndew kiba pynmih naka ri lajong la shah kheiñ beaiñ noh ïaki.
U la ong ruh ba ki paidbah ki dei ban sngewthuh shai b aka party HSPDP ka dei pa party kaba la ïakhun dohiap ban pynioh ïaka jylla ba pura bad bun naki nongïalam jong ka kila shong phatok ruh ban aiti ïala ka jingim naka bynta ka jaitbynriew ban ioh noh ka jylla ba pura bad watla ka dei ka party kaba rit naka liang utei u nongïalam u la kop ruh ba katei ka party kan khie im biang ha kane ka elekshon ban wan bad ki sing shynrang bad sing kynthei kin kyrhuh naka bynta ban pynim pat ïa katei ka party bad ka jaitbynriew.