Shillong, Jymmang 29 : Ka Hills State People’s Democratic Party (HSPDP) hynne ka sngi ka la shim ïa ka rai ban rah ïa ka ishu jong ka State Reservation Policy bad u Myntri Rangbah ka jylla bad ruh ha ka jingïalang jong ka Meghalaya Democratic Alliance.
Haba kren bad ki lad pathai khubor, u President ka party, Bah KP Pangniang u la ong ba ka party wat ha ka manifesto ruh ki la pynrung ïa ka Reservation Policy bad ka la kdew ruh ba lada ki paidbah ki jied bad pynkupbor ïa ka party, kin bishar bniah biang ïa katei ka policy.
Tangba, u ong pat ba na ka jingjur ki jingdawa, ka party ka la rai ban rah ïa kane ka ishu sha u Myntri Rangbah bad ruh ha ka Coordination Committee jong ka MDA ban ïatai halor ka jingdawa ban pynkylla ïa ka Reservation Policy.
“Ngin sa rah ïa kane ka phang bad u Myntri Rangbah bad baroh ki dkhot ka MDA ban kyntu ïa ka sorkar jylla ba kan ïatai lane rah ïa ka jingïakren halor ka Reservation Policy,” ong u Bah Pangniang.
Ha kajuh ka por, u MLA ka Mawshynrut ba dei ruh u dkhot ka Roster System Committee u la ong ba un sa rah ïa kane ka phang kaba ki kren ha ka party ha ka jingialang jong ka komiti Roster.
