Shillong, Risaw 07 : U President jong ka Meghalaya Rural Tourism Forum (MRTF) Bah Alan West Kharkongor u la leit ban pynsngew ha u Myntri ka tnad Tourism Bah Paul Lyngdoh ba ka jingïalang jong ki Khlieh Nongsynshar Shnong ryngkat bad ki nongpynïaid ïa ki jaka jngohkai pyrthei kaba long ha ka 30tarik u Nailur ki la pynpaw ba kan don ka jingktah kaba jur lada jia ba khang ïa ki kali kamai na bar jylla ba kin wan sha ki jaka jngohkai pyrthei kiba don ha ka ka jylla.
Haba kren bad ki lad pathai khubor hadien ka jingkynduh bad u Myntri, u Bah Alan u la ong, “Ha katei ka jingïalang kala don ka jingïathir sani bha halor ka jingdawa ka All Meghalaya Khasi Tourist Taxi Association (AMKTTA) na ka Sorkar Jylla ban khang ïa ki kali kamai na bar jylla ban kit ïa ki nongwan shang pyrthei sha ki jaka jngohkai hapoh Meghalaya. Kumta ngi la shim ïa ka rai ban pyrshah ïa ka jingdawa ka AMKTTA namar kane ka long pyrshah ïa ka Riti Synshar ka Ri India ban khang ïa uno uno u nong India ban wan ne rung sha kano kano ka Jyla ka Ri.”
La ïathuh ruh ba halor ka jingdon kiba dawa ban pyntreikam ïa ka Sikkim Model ha kane ka jylla, ki la pynpaw ba kam ïahap satia ban leh ha Meghalaya namar kane kadei ka jaka pdeng kaba kiwei ki jylla kum ka Assam, Tripura bad Mizoram ki hap ban ïaid lyngba nangne.
Nalorkata, u la ong ba ka Forum ha ka jingïakynduh ïa u Myntri, kala dawa ban kynthup lang ïa ki nongpynïaid kam jngohkai pyrthei h aka Committee ba la thaw ka Sorkar Jylla ban khmih ïa ki jingdawa jong ka AMKTTA.
“Ngi la kyntu ïa u Myntri ka tnat Tourism ban khot noh ïa ka jingïalang jong ka Committee ban ïakren halor ki jingeh ba kynduh ki nong ñiah kali tourist bad ngi la ai jingmut ïa u Myntri baka Committee kadei ban pyndep ïa la ka kamram hapoh hynriew bnai bad naka liang u Myntri ka tnat Tourism u la pynthikna ba shen kane ka Committee kan lum noh ia ka jingïalang” u la ong.
Shwa kane, u Bah Alan u la ïathuh ba ki la ïoh sngew ruh ïa ka jingeh kaba khraw ba ki kali kamai na kane ka jylla ki kynduh haba ki leit sha kad liengsuiñ ha Guwahati bad kumta ki kyntu ïaka sorkar ba kan tuklar lang halor kane ka jingeh jong ki.
