Yn ktah jur ïa ka pla tyngka jong ka sorkar, ong u CM

Shillong, Naitung 14 : U Myntri Rangbah ka Jylla, Conrad K Sangma u la ong ba kan don ka jingktah kaba jur ïa ka pla pisa jong ka sorkar jylla lada pynbun shuh shuh ki Battalion ha ka jylla na ka bynta ban pynkhlaiñ ïa ka jingtreikam jong ka tnad pulit.
Katei ka jingkren jong u, kadei halor ka jingkwah jong ka Police Department ban kyntiew noh ïa ka battalion sha kaba 7 bad kaba phra.
Haba pynpaw ïa kane hadien ka jingïalang bad ki Superintendent of Police kumjuh bad ki Commandant ha kane ka sngi Balang, u Myntri Rangbah u la ong ruh ba ka sorkar jylla mynta kan hap ban da pyrkhat sani bha ha shwa ba kan shim ïa katei ka sienjam.
Da kaba pynpaw ba kin hap ba da bishar bniah bha ha shwa ba kin shim ïa ka rai, u Myntri Rangbah u la ong pat, “Ka jingïakren halor kane ka phang ka dang ïaid tangba ngim pat shim ïa kano kano ka rai.”
Lah ban kdew hangne, ba dei ha u Jylliew jong u snem ba la dep, u Myntri Rangbah u la ong ba ki donkam ïa ka jingkyrshan lang jong ka sorkar pdeng na ka bynta ban pynkha thymmai shuh ïa ki battalion, tangba ka jingkit kaba khia pat kan dei ha ka sorkar jylla ban pynïaid nangtei shakhmat.
Halor kane, u Myntri Rangbah u la ong ba ha kaba sdang hi ka jingpynlut kam da dei kaba haduh katta katta hynrei lada kaban ktah pat kan dei hadien, kata ha ki 15 – 30 snem hadien. “Dei na kane ka daw ba ngi hap ban bishar lut ha baroh ki liang,” la bynrap shuh shuh u Myntri Rangbah.