Shillong, Nailar 10 : U Myntri ka tnad Kampohiing ka jylla, Bah Lahkmen Rymbuid u la ong ba ki pulit kin khynra naphang ïa ki briew kiba donkti ha ki kam khaii drok ha kylleng ki bynta jong ka jylla.
Da kaba ïaroh ïa ka tnad pulit kiba la ïoh ban kurup kylleng ki jaka, u Myntri u ong ruh, “Ki pulit ki la khynra naphang bad kem ruh ïa kiba donkti ban pynïaid iew ïa u,” u la ong.
Haba jubab pat halor ka daw ka jingkynrei kynsan ka jingkhaii drok ha ka jylla khamtam eh ha nongbah Shillong, u Myntri u la ong ba ka daw lehse kadei namar ki samla ki ïohi ba kadei ka lad kamai kaba ïoh pisa kloi puk puk bad lehse don ruh kiwei ki lad kiba pynlong ïa ki ban shim ïa kaei ka lynti.
“Tangba ki pulit kin ym map hynrei kin leh beit katkum ka aiñ ïa kito kiba donkti ha katei ka kam khaii drok,” u la bynrap biang.
Shuh shuh u la ong pat ba haduh mynta ki pulit kim pat ïoh jingtip eiei ba kin don ki jaka ba ki nongkhaii ki die laitlan ïa kitei ki jingdih beaiñ bad kumta u kyntu ïa kiba ïohi ïa kum kitei ki jingjia ki lah ban pyntip mardor sha ki bor ba dei peit.
