Shillong, Nailur 4 : Namar ki hynriew tylli ki mat ba kongsan kim pat treikam satia hadien ba kane ka sorkar ka la kular ban pyntreikam ïa ki, kumta na ka liang u MLA ka Mawlai Constituency u bah Process T Sawkmie ula rai ban khyllie biang ïa kine ki mat ha kane ka Dorbar Synrai ka ban sdang naduh ka 9 tarik mynta u bnai Nailur.
Kine ki hynriew tylli ki mat ba kongsan ki long ka Inner Line Permit (ILP), ka jingpynrung ïa ka Ktien Khasi bad Garo ha ka Khyrnit kaba Phra, ka jingpynkynriah ïaki CRPF na Mawlai, ka jingweng ïa ka Marten na Mawlai, ka jingpynkynriah ïa ki Kharmetor na Them ïew Mawlong bad ka jingeh ba ki nonghikai ki ïakynduh bad hap ban ïakhih na ka por sha ka por.
Haba ïakren bad u nongthoh khubor u bah Process u la ong “ Ngan khylli ïa kine ki mat hapoh ka Assembly khnang ba ki paidbah kin ïoh jingshai kdar na ka sorkar. ïa ka ILP kaba la dep mynjur da ka ïing Dorbar da ka Resolution bad la ai ruh sha ka sorkar pdeng naduh u snem 2019 hynrei haduh mynta ym pat ïoh jingshai la ka long kumno kane ka kam. Aiu ba ka sorkar jylla ka la leh ban bud dien na ka sorkar pdeng namar mynta sa tang katto katne bnai ka samoi jongkane ka sorkar ka la kut noh bad la wan ka election”.
“ïa ka jingdawa ban pynrung ïa ka ktien Khasi bad Garo ha ka Khyrnit ba Phra ruh ngi kwah ban ïoh jingshai haduh katno kane ka kam ka la tyllun shakhmat bad kaei ka jubab na ka sorkar pdeng halor kane ka mat jingdawa ba la slem bah jongka jaidbynriew. Nga kwah ruh ban ïoh jingshai na ka sorkar balei ba sahteng ka jingkular ban weng ïa ki CRPF na Mawlai sha kawei pat ka jaka. Namar na ka liang u Myntri Rangbah u Conrad K Sangma ula dep kular hakhmat ki nongïalam bad ki paidbah ba un pynkynriah beit ïa ki CRPF na Mawlai. Ka jingdawa weng ïa ka jaka bret niut ne Marten na Mawlai Mawiongrim namar halor kane ruh ka sorkar ka la dep kular ban wad jaka noh shawei hynrei haduh mynta ym pat i khih khohreh na ka liang ka sorkar”, ong biang u bah Process.
Shuh shuh u la ong “ Ngan khyllie ruh ïa ka rai ban pynkynriah ïa ki Kharmetor na Them ïew Mawlong namar ki paidbah ki kwah ban tip shai halor kane namar la shu i tang na ki lad pathai khubor ba ka sorkar ka la pynkhreh ia kata ka Blueprint bad lyngba katei ka Blueprint ka la pynpaw ba la rai ban pynkynriah ïa ki sha ka Quarter ba la shna lypa kaba hajan ka ïing sah ( Quarter) u nongïalam ka Liang Pyrshah u Dr Mukul Sangma.Namar ïa kane ruh dei ban ïoh jingtip kaba shai kumno ka sorkar ban pynkynriah ïa ki ha katei ka jaka, hato katei ka jaka ka biang ne em na ka bynta jongki. Nalor kata kawei na ki mat kiba kongsan tam kiba ngan rah hapoh ka Assembly ha kane ka Dorbar Synrai ka long halor ka jingeh ba ki nonghikai ki ïa kynduh ba ki hap ban ïakhih na ka por sha ka por na ka bynta ka tulop bad kiwei kiwei ki jingsiew ba ki dei hok ban ïoh”.
“ Kynmaw ki nonghikai ki long ki nongtei ïa ka lawei jong ka jaidbynriew bad jylla hi hynrei lada ngim burom ïa ki nonghikai long lehnohei ba ngin shong ha shuki namar ma ngi ki nongmihkhmat paidbah ruh ngi long kumne dei lyngba ki nonghikai kumta nga la rai ban shim khia bad dawa ruh hapoh ka ïing dorbar ba ka sorkar ka dei ban ai ka kular kaba biang na ka bynta ka lawei bad ki jingmyntoi jong ki nonghikai khnang ba kin ym hap shuh ban ïakhih hynrei ban pynleit jingmut naka bynta ban ai jinghikai ïa ki khynnah skul” Pynkut u bah Process T Sawkmie.
