Yn khotlang ïa 7 ngut ki MLA ka Jaiñtia, ban pynneh ïa ka Riti ka Dustur: Sniawbhalang Dhar
`15 lak kular u ma Sniawbhalang ban ai ïa ka Raij Raliang
Jowai, Rymphang 13: U Symbud Myntri Rangbah ka sorkar jylla u ma Sniawbhalang Dhar mynta ka sngi Thohdieng 13 tarik u Rymphang, 2026 haba ai jingkren haka jingïalang jong ka prokram ‘Lehñiam Pastieh’ ha Madan Iaw Raliang ula kular ban pynïoh haduh 15 lak tyngka sha ka Raij Raliang na ka bynta ki jingdonkam.
Na ka liang u Symbud Myntri Rangbah ula ai ka jingkitbok kitrwiang ïa ka Raij Raliang Pastieh Committee kaba la pynlong ïa kane ka ‘Lehñiam Pastieh’ kum ka dak ban pynneh pynsah ïa ka Riti ka Dustur jong ki longshwa manshwa ba kan nang kiew shuh shuh ha kiwei pat ki snem ban wan.
Shuh shuh u ma Dhar ula ong kane ka dei ka sien kaba nyngkong kum u MLA ba nga ïoh lad ban wan sha kum kane ka prokram Shad Pastieh, ha ka juh ka por u pynpaw ka jingai khublei ïa baroh ki khun ka Raij Raliang naduh ki longkmie bad ki longkpa kiba la wan ban ïashim bynta lang ha kane ka prokram hapdeng ka jingshong kun.
Ula ai khublei ïa ki longshwa manshwa kiba burom ïa ka jinglong tynrai ba kyrpang na ka bynta ka jaitbynriew, da kaba u ong ba ka Ri India ka long kawei na ki ri ha ka pyrthei kaba pdiang ïa baroh ki jaitñiam khlem da ñiew shilliang.
“Wat la ka jylla Meghalaya ka long kaba rit bad kaba tang 50 snem tam ka rta, hynrei ka kiew ha baroh ki liang namar ka don ïa ka jingngeit ba bun, ha ryngkat ka jingïasngewthuh jingmut ka jingïaburom bad ka jingkyntu mar kylliang kiba la hikai naduh ki longshwa manshwa,” ong ma Sniawbhalang Dhar.
U la ai ka jingïaroh ïa ka Raij Raliang kaba la bat skhem ïa ka jinglong tynrai, ïa kaba u Myntri Rangbah duh ka Ri ula angnud ban pynkiew ïa ka Riti ka Dustur bad ka jingïeid jaitbynriew.
Kum nongmihkhmat ula pynsngew ba ha kine ki bnai Tlang ban wan, kum u MLA un lung ïa ka jingïalang kaba ar sngi ïa baroh 7 ngut ki MLA napoh ka Ri-Lum Jaiñtia bad ki MDC ban ïakren bad ïaphylliew jingmut lang ha kaba ïadei bad ka Cultural Program bad ban lum ban lang ïa baroh ki Riti ki Dustur kiba don hapoh ka Ri-Lum Jaiñtia.
Haba pynkut u ai ka jingïaroh ïa ka Seiñ Raij Jowai kala la ïarap ban ai jingmut ïa ki khun jong ki Raij bapher bapher jong ka Bri u Hynñiewtrep ban pynim ïa ka Riti ka Dustur, kumta u kyntu ïa ki Raij ban don ka jingïatylli bad ka jingïarap kylliang ha baroh ki liang.