Yn khang shipor ïa ka surok na lad Sakwang, lad DC, lad Rangmaw sha lad ophis DC

Mawkyrwat, Rymphang, 23: Khnang ban lait na ka jingkhapngiah, ka jingdheng kali bad ka jingjia aksiden, ha kaba ïadei bad ka jingñiew vote na ka bynta ka election sha ka KHADC ka ban long ha ophis jong u Deputy Commissioner ka South West Khasi Hills District, la pyntip paidbah ba kan don ka jingkhang ïa ka surok bah ka ban leit sha ophi sDC’, Laitlawsang.
U Superintendent of Police ka South West Khasi Hills District u la pyntip ba ha ka 24 tarik, Rymphang kan don ka jingkhang ïa ka jingleit jingwan jong ki kali naduh lad sakwang (District Court) sha Jakrem la pynbeit kumne: Ym shah ban ïaid kali na lad Sakwang sha Ophis jong u Deputy Commissioner, South West Khasi Hills District hynrei la bthah ba ki kali kiba wan na Mawkyrwat bad kiba ïaid sha Jakrem kin hap ban ïaid na lad Sakwang (District Court) lyngba ka Pyndensakwang – Sakwang sha Jakrem.
Ym shah ban ïaid kali na lad Jakrem sha ophis u Deputy Commissioner hynrei ki kali kiba wan na Jakrem sha Mawkyrwat ki hap ban ïaid na lad Mawthawpdah (Jakrem) lyngba ka Sakwang – Pyndensakwang sha Mawkyrwat.
YM shah ïaid kali na Pyndenspar (Lad Rangmaw) sha ophis u Deputy Commissioner hynrei ki kali kiba wan na Rangmaw sha Mawkyrwat ki hap ban ïaid na lad Mawthawpdah (Jakrem) lyngba ka Sakwang – Pyndensakwang sha Mawkyrwat.
Ka ophis ka kyrpad ïa ki paidbah ba kin ai lem ka jingïatreilang khnang ban lait na ki jingjia ba sngewsih.