Nongpoh, Nailur 29: Kum ka jingburom khatduh ïa u Paiem RH Wahlang (Bam kwai ha dwar u Blei) Syiem ka Hima Jirang u ba la khlad noh na kane ka sla pyrthei haka 27 tarik mynta u bnai hapdeng ka jingshah sumar ha NEIGRIHMS Hospital hadien ka jingshitom kaba la neh katto katne por, naka liang ka ophis u Syiem ka Jirang Syiemship kala pyntip ba baroh ki dukan bad ki jaka khaii pateng hapoh u pud u sam ka Hima Jirang kin khang khyrdep haka 30 tarik mynta u bnai naduh dangstep haduh ban da dep ka jing ontep.
Naka liang u Bah S Wahlang Secretary ka Hima u la pyntip ba kane ka dei shibynta ka dak ka jingburom haka sngi lehñiam ba khatduh ïaka met ba dangsah jong u Syiem ka Hima bad la kyrpad ïa baroh ki khun ki raiot hapoh ka hima ba kin burom ïa katei ka hukum, kumba u Paiem RH Wahlang u la khlad ruh kum u Syiem ba 3 ka Hima u ba la bat ïaka jinglong Syiem mynta la palat 20 snem.
Ka jingleit ontep ïa u Paiem RH Wahlang kan long haka 30 tarik mynta u bnai haka Balang Presbyterian Wahsynon.
