Shillong, Naiwieng 23: Ka Dorbar Shnong ka Mawlynnong, ha ka sngi Saitjaiñ, ka la pynbna ba ka Shnong, kaba la bna nam ïa ka jingkhuid ha ka dewbah Asia, kan khang noh ïa ka jingwankai ki nong shangkai ne nongjngohkai ba shisngi ha ka Sngi U Blei, ka ban sdang naduh u Kyllalyngkot 2026.
Ha ka kyrwoh khubor la ong ba ïa kane ka rai, la shim hadien ka jingïashong pyrkhat bha, da ka jingthmu ba ailad ïa ki nongshong shnong ba kin leit sha ki Ïingmane khlem ka jingpynthut bad ban pynneh pynsah ïa ka nam ka burom jong ka Shnong.
Ka kyrwoh khubor ka ong, “Ha Mawlynnong, ka Sngi U Blei ka dei ka sngi kaba jan baroh ki leit sha ki Jingïaseng ha ki Ïingmane baroh shisngi, kumta kin ym lah ban ai ïa kano kano ka jingshakri la pynbit pynbiang ïa ka jingdonkam jong ki nongwan shangkai.”
Naduh u Kyllalyngkot 2026, ka Shnong Mawlynnong kan plie ïa ka jingwan ki nongwankai tang ha ka sngi Nyngkong haduh ka sngi Saitjaiñ.
Ha ka sngi U Blei, baroh ki kam bad ki jingshakri ba ïadei bad ki nongwan shangkai, kynthup ki restaurant, ki dukan bad ki paiñkhana paidbah kin khang khyrdep lut.
Kane kan ym treikam pat ïa ki nongjngohkai kiba la buh lypa ban sahmiet ha ki guest house lane ki homestay ha ki sngi pohïa bad pynjlan ïa ka jingsah jong ki haduh ka sngi U Blei bad kumjuh ruh ïa kito kiba kwah ban buh kamra ha ka miet sngi U Blei,
Haba ïadei bad kane, ka jingkitkhlieh ïa ka jingshakri bad ka jingpdiang sngewbha kan shong beit ha ki trai jong ki Guest House/Homestay.
Ka Dorbar Shnong Mawlynnong ka la kyntu ïa ki nongwankai ba kin burom ïa ka rai jong ka Shnong bad ban ïatreilang ruh bad ki nongshong shnong.
