Yn kham pynstet noh ka jingpyntrei ïa ka surok Shillong -Dawki : Dy CM

Shillong, Risaw 09 : U Symbud Myntri Rangbah ka Jylla Bah Prestone Tynsong ha ka sngi Balang u la ong ba ka sorkar kan pyntikna ba ka jingpyntrei ïa ka surok Shillong – Dawki kan kham stet noh nangne shakhmat khnang ba yn lah ban pyndep noh ïa katei ka surok bah ha ka por ba la buh.
Ia kane ka rai la shim hadien ka jingïalang buddien ba la lum da u Symbud Myntri Rangbah bad ki ophisar ka tnad PWD, nangta na ka NHIDCL, ka kompeni ba pyntrei bad kumjuh ruh ka SDO bad BDO jong ka Pynursla nalor kiwei kiwei, ha kane ka sngi Palei ha Secretariat.
Haba kren bad ki lad pathai khubor, u Symbud Myntri Rangbah u la ïathuh ruh ba ha kane ka jingïalang la ïatai sani ruh halor ka working plan khnang ba kan ym ktah ïa ka leit ka wan jong ki paidbah ha shi lynter katei ka surok.
“Ka shong mynta sa na ka liang ka kompeni la ki kwah ban trei mynmiet ne mynsngi ne kaei kaba bha tam bad kaba shngain ïa ki paidbah bad ruh na ka bynta ki nongtrei surok. Ïa kane ruh ngi phah biang ha ki ba kin sorbe bad peit khnang ba ngin lah ban pyndep ïa kane ka surok ha ka por kaba biang,” u la ong.
Shuh shuh u ong ruh ba mar ïa sangeh u slap na ka liang ka NHIDCL ka la ai ka kular ba kin trei stet noh ha kane ka por ba rang. “Ki ruh ki kwah ban pyndep ïa ka kam ha ka por ba la buh kata ïa ka Fourlane ha u Nohprah mynta u snem bad ïa kaba sah pat ha u Nohprah 2026.”
Haba jubab pat halor ka jingkylli, u Bah Prestone u la ong ba kam dei satia ka jingshisha ba kane ka jingpyntrei ka suki. Katkum ka jingïathuh jong u, ka jingpyntrei lei lei mynta ka la ïaid stet naduh ba shimti ki kompeni ba thymmai hadien ba ki kompeni kiba nyngkong ki la shah pynsangeh.