SHILLONG, Risaw 31: Ka tnat ba dei khmih ïa ka kam ïalehkai jong ka Sorkar Jylla kan sa phah ïa ka kynhun ban ïashim bynta ha ka 68th National School Games 2024-25 ban sa wan ha ka jingïalehkai Basketball.
Kane ka lympung kan hap hapoh ka jingpeit jong ka School Games Federation of India, bad yn pynlong ha Patiala, Punjab naduh ka 20 tarik haduh 26 tarik u Naiwieng, 2024.
Ha kaba ïadei bad katei ka phang ba la kdew haneng, na ka liang jong ka Meghalaya Basketball Association ha ryngkat ka jingïatreilang bad ka tnat sports jong ka sorkar jylla kan pynlong ïa ka jingpyrshang ban jied ïa ki nongïalehkai (selection trail) na bynta ki khynnah ïalehkai kiba hapoh 19 snem (Under-19).
ïa ki khynnah shynrang ka jingpyrshang jied player kan long ha kane ka 01 tarik Naiwieng, sngi Thohdieng, 2024 katba ïa ki kynthei yn pynlong ha ka sngi ba bud (02 tarik Naiwieng, 2024) ha madan ïalehkai Basketball kaba ha J.N. Sports Complex, Polo – Shillong.
Kumta ki khynnah kiba kwah ban pyrshang ïalade ban shah jied ki donkam ban rah ïa ka Aadhar card, nangta ka syrnod sngikha (Original Birth certificate) na bynta ban pynshisha bad ki lah ban wah ha kitei ki tarik bad ka jaka ba la kdew naduh ka por 7 baje mynstep. Tang ki khynnah kiba kha ha lane shuwa ka 01 tarik Kyllalyngkot, 2006 ki lah ban shimbynta.
Katkum ka kyrwoh ba la pynbna da ka tnat Sports jong ka Sorkar Jylla, ïa ki jingtip ba kham bñiah lah ban kren bad ka Kong Yolinda Hynniewta, coach Basketball, Phone No: 8794435276.
