Shillong, Jylliew 12: Ka Tyrsad Area Sports Association (TASA) kan sa pynlong ka lympung jied ne ka trial ïa ki khynnah ïalehkai kynjatbol shynrang bad kynthei kiba don ha ka karta kaba 6 haduh 12 snem.
Kane ka jingjied kan dei na ka bynta ka Tyrsad Grassroots Level ka ban pynsdang ban ai jinghikai biang ïa ki khynnah ïalehkai kynjatbol kaba kum ka association la pynsangeh ha u 2020-21 na ka daw u Covid.
Ka TASA ka pyntip sha baroh ki sport club naduh thaiñ Wahlyngklen, Lyng-ïong, Tyrsad, Sawsymper, Laitmawsiang, Nongspung kiba hap hapoh ka TASA ba kin hap ban jied thymmai biang ïa ki khynnah bad phah sha ka shlem ai jinghikai na bynta ki khynnah rit bad kin pyntip ruh hapoh shnong jong ki ban phah ïa ki khynnah ban wan sha kane ka lympung ban jied na bynta kane ka Grassroots Level ka ban long ha ka 25 tarik u Jylliew, 2022 naduh ka por 8 mynstep ha madan Sohjhursaw Tyrsad, East Khasi Hills District.
