Yn ïohei ka jylla ïa ka bording kaba 12% na ki Hydro project kiba rit, ong u Bah Metbah

Shillong, Rymphang 26: U Myntri ba khmih ïa ka tnat Bording u Bah Metbah Lyngdoh u la pynbna ba ka Meghalaya Power Generation Corporation (MePGCL) ka la dep ban pyndep ïa ki detailed project reports (DPR) na ka bynta jong ki 12 tylli ki hydro power project kiba rit kiba long kumba 63 MW bad la mynjur ruh ïa ki projek lade kiba dei 37.5 MW, ha kaba kane ka la pynshkem ïa ka 12% ka bai bording kaba ïohei bad ka 1% LADF na ka bynta ka jylla.
Ïa ka jingmynjur ban pyntreikam la dep ban soi bad ka Power Distribution Corporation Limited kaba dei jong ka jylla hi ka la dep soi ïa ka jingmynjur ban thied bording kaba long 30%, ong u Bah Lyngdoh.
“Na ka liang jong ka sorkar ka la dep ruh ban mynjur ban soi ïa kane ka jingpyntreikam na ka bynta ki projek ba heh bad ki kompeni kiba shimet. Na ka liang ka jylla kan ym don bynta ba kano kano ka PPA ha kaba ïadei bad ka project, hynrei kan ïohei ka bording kaba long 12%,” u la bynrap.
Ha kaba ïadei bad ka jingïaid jong ka kam ka Riangdo Small Hydro Project, u Bah Lyngdoh u la ong, “Kane ka project ka dang don hapdeng ka jingtei bad kumba 48% jong ka kam ka la ïaid bad ïa kane ka project la khmih lynti ban pyndep ha u snem 2028.”
Ïa kane ka project, la sdang kumba 3 MW (3X1 MW), bad la dep ban kyntiew sha ka 6 MW da ka jingmang kaba long T. 68.32 klur.
“Na ka liang ka IIT Roorkee ka la dep ban aiti ïa ka DPR na ka bynta ban pynbha ïa kane ka project na ka 3 MW sha ka 6 MW. Kane ka project kan kiew na ka 17 MU ha ka shisnem sha ka 28 MU manla ka snem,” ong u Bah Lyngdoh.
U la ong ruh ba ka sorkar ka ladep buh ka jingmang pisa kaba T. 15 klur na ka bynta ka jinglut na ka bynta kane ka snem mang tyngka.
Na ka liang jong u Bah Lyngdoh u la pyntip ba ki projek kiba dang wan ki kynthup ïa ka jingpyndep ïa ka Detailed Project Report na ka bynta ka 210 MW Myntdu Leshka Phase II project, ba la khmih lynti ba kan pynmih bording kumba 591.