Shillong, Jylliew, 15: Ka kabu ka la plie war ïa ki samla pule, kiba la duh lad ban leit thoh ïa ka ekamin CUET, na ka daw ba ki Centre thoh eksamin ki don shabar ka jylla.
Ïa kane la pyntip da u Joint Secretary in-charge ka tnat Pule Puthi u Bah D. Lyngdoh ha ka sngi Palei.
“…….ïa ka kam kaba ïadei bad ka eksamin CUET 2023 la shimkhia da ka Ministry of Education bad ka National Testing Agency (NTA) ka Sorkar India bad ka Sorkar Jylla, la pyntip hangne ba la ailad tang ïa kito ki samla kiba duhlad ban thoh ïa ka eksamin na ka daw ka jingïoh Centre shabar jong ka jylla Meghalaya katkum ka data ba la aiti sha ka NTA,” ong u Bah Lyngdoh ha ka jingpynbna.
Kane ka long hadien ba u Myntri Rangbah ka Jylla u Conrad Kongkal Sangma u la phah da ka jingthoh ba kyrpad ïa u Myntri ka Ministry of Education u Dharmendra Pradhan ban bthah ïa ka National Testing Agency (NTA) ba kan plie lad ïa ki samla pule ka Meghalaya kiba la duh ban leit thoh ïa ka eksamin.
U Myntri Rangbah u la pyntip ha ka shithi sha u Myntri ka Sorkar Pdeng ba ka Sorkar Jylla la bunsien ka la ïoh ïa ki jingujor na ki samla pule jong ka jylla Meghalaya halor ka jingphah thoh ïa ka eksamin CUET shabar ka jylla Meghalaya, kum ha Ranchi, Jharkhand, Jorhat, Dibrugarh, Kolkata bad sha ki jylla ba shathie jong ka ri India kaba pynlong ïa ki samla pule bad ïa ki kmie ki kpa ba kin khuslai jingmut bad buh jingeh ruh ïa ki samla pule, kiba la pynkhreh bha ïalade ban ïakhun ïa ka eksamin da ka jingpyrkhat ba ki Centre thoh eksamin kin long beit hapoh ka jylla.
