Yn ïoh ïatai bun ki mat ba ktah ïa ka jylla lada kham bun ki sngi long dorbar : Dr. Mukul Sangma

Shillong, Nailur 03 : U Nongïalam ka Liang Pyrshah ha Iing Dorbar Thawain ka Jylla, Dr. Mukul Sangma u la pynpaw ka jingsngewkhia halor ka jingduna palat ki sngi long dorbar ha kane ka Dorbar Synrai kaban sdang naduh ka 08tarik mynta u bnai da kaba ong ruh ba kan buh jingeh bha ban ïakren ne ïatai ïa ki mat ba donkam tang hapoh i por ba lyngkot.
Haba kren bad ki lad pathai khubor, u Nongïalam ka Liang Pyrshah u la ong u la ong ruh naba ki don bun bha ki motion bad ki jingkylli ba ki phah, kumta donkam ïa ka Liang Pyrshah ban treilang khnang ban ïoh pyndonkam hok ïa ka por ba ki ïoh.
U Dr. Mukul u la banjur ruh ïa ka jingdonkam kham bun ka por na ka bynta ki mat ïatai halor kiba bun ki ishu kiba kongsan kiba ktah ïa ka jylla bad ïa ki nongshong shnong jong ka.
“Mynta baroh ki ishu ki long kiba kongsan. Ngim lah ban ong ba kane ka kham kongsan ban ïa kawei pat namar ka jingshisha ka long ba ngi donkam ban peit kano ka ishu kaba kham donkam,” u la bynrap shuh shuh.
Shuh shuh u Nongïalam ka Liang Pyrshah u la kdew ba katba nang kham bun ki sngi long dorbar katta ka nang pynmyntoi ym tang ïa ka liang pyrshah hynrei ruh ïa ka sorkar namar ka pynlong ia ki Myntri ba kin lum jingtip na baroh kawei ka jylla.