Shillong, Naitung 26: Ka wat ïakhun kaba ar jong ka Meghalaya Youth League 2024 kan sdang biang mynta ka sngi, ha kaba ki madan ba thymmai kin ïoh ïa ka lad ban pynlong ïa ki jingïalehkai.
Hadien ba seisoh ka sngi plie pyrda ha ka Sngi Saitjaiñ ba ladep, ki jingïalehkai kin poi sa sha Resubelpara (Resubelpara Mini Stadium), Jowai (Kiang Nangbah Stadium), Saipung (SBSA Football Ground), Pynursla (UUP Football Stadium), Tyrsad (Mawlum Tyrsad Playground) bad Riangdo (Riangdo Playground) mynta ka Sngi ha ka sien ba nyngkong, bad katto katne ki madan ki ba ïoh pynlong ha ka sien ba ar.
Kane ka lympung phutbol ki shynrang kyrdan U-14 bad U-16, ba la pynïaid da ka Meghalaya Football Association ha ryngkat ka jingkyrshan na ka Sorkar Jylla Meghalaya, la pynlong ha ka rukom ïakhun ‘hala-ïing bad shabar’ lane ka ‘home-and-away’ hapdeng ki kynhun jong ki synjuk na ki district bapher bapher, ha kaba 20 tylli ki la ïashimbynta ha kane ka lympung.
Ka jingmut kaba don ha lyndet ka long ban pyndonkam ïa kane ka lympung kum ka rynsan ban jied ïa ki kynhun samla ki ban mihkhmat ïa ka Meghalaya ha ka National Level. Kan plielad ruh ïa ki rangïalehkai phutbol kiba dang rit ban shemphang shuwa ban poi lehkai ha ki klob ba la rangbah bad kan pynlong ïa ka Meghalaya kum kawei na ki jylla ba khlaiñbor ha ka phutbol hapoh ka ri.
