Yn ïatreilang ka NEHU bad ka ri Russia ban ai ka jingpule ïa ki jait ktien ha ka pyrthei

Shillong, Naitung 08: Ka North-Eastern Hill University (NEHU) ka la shim ïa ka sienjam kaba kongsan ban pynjur ka jingïatreilang bad ki jaka pule ka ri Russia lyngba ki jingïakren ki jait ktien bad ka jingïatreilang halor ka pule puthi khamtam ïa ki jait ktien kiba donkam ha ka pyrthei.

  Ka jingïalang ka thmu ban buh ïa ka Russian Language Centre ha NEHU bad ban pynïar ka jaka na ka bynta ka jingïatreilang kaba hadien habud ne ka lawei halor ka pule puthi, ki kam wadbniah bad ka jingïohlad ki samla pule ban mih shakhmat ha ki kam pule puthi.

  Kane ka centre kaba la tyrwa ban buh kan ailad ki kam hikai ha ka ktien bad ka jingïasngewthuh ha ki kam kolshor, kan pynkup bor ïa ki samla pule ban ïeng lang bad kiwei ki ri ka pyrthei.

  Ka NEHU bad ki jaka pule ka ri Russia ki la ïasyllok na ka bynta ki joint degree, ka jingïasam ïa ki sap ki phong hapdeng ki samla pule bad ki nonghikai, nangta haba ïadei bad ki internship, bad ki short-term certification course.

  Ka Ufa University of Science and Technology (UUST) ka la pynpaw ïa ka jingkwah ban pdiang sngewbha ïa ki samla pule riewlum na kane ka thaiñ shatei lammihngi ka ri India na ka bynta ki internship, ki prokram ha ka pule puthi bad ki jingïatreilang ha ki kam wadbniah.

  U Vice Chancellor ka NEHU Prof Prabha Shankar Shukla u la ong, “Kane ka jingsdang kam dei tang shaphang ka jinghikai ha ka ktien ka thylleij. Hynrei ka dei shaphang ka jingpynkupbor ïa ki samla pule jong ngi ban ïeng lang bad kiwei ki ri ka pyrthei haba ïadei bad ka kam pule puthi.”

Na ka liang ka Rita Filippova, Vice-Chancellor for International Affairs, UUST ka la ong, “Ngi kwah shisha ban pdiang sngewbha ïa ki samla riewlum kane ka thaiñ shatei lammihngi jong ka ri India ban ïashim bynta ha ki kam internship, short-term academic program, bad ki jingïatreilang ha ki kam wadbniah ha Ufa.”

  U Prof. Md. Iftekhar Hussain, Dean, School of Technology, NEHU u la ong, “Ngi angnud ban ïarap ïa ki samla ha ki joint degree program, kyrpang ha ka kam pule engineer, biotechnology, bad ki applied science.”

  Ha kajuh ka por ka NEHU ka dang pynkhreh ban soi ïa ka MoU bad ki riewshemphang ki ri ka pyrthei kum ka Dr. Skill ban pynïasoh ïa ki jingtbit ha kam pule kaba plie lad ruh ban ai kam bad kiwei ki jingdonkam.