Shillong, Naitung, 16: Ka sorkar jylla ka la rai ban ïateh bad ka North Eastern Electric Power Corporation Limited (NEEPCO) ryngkat bad kiwei ki PSUs jong ka sorkar pdeng na ka bynta ban pyntreikam ïa ki projek ha kaba ïa ki MoU kiba la dep ban soi la pyndam noh dang shen.
“Ngi la shimkhia ïa kane bad ngan sa peit ba ki MoU ba la soi bad pyndam noh, ngin sa ïateh ruh bad ka NEEPCO kumjuh bad kiwei kiwei ki PSU jong ka sorkar pdeng,” ong u Symbud Myntri Rangbah ka jylla ba dei peit ïa ka tnad Bording, Bah Prestone Tynsong haba kren bad ki lad pathai khubor ha kane ka sngi Nyngkong.
Dei ha ka 20tarik u Ïaiong, ka sorkar jylla ka la pyndam noh ïa ki Memorandum of Agreement (MoA) ba la soi bad ki kompeni na ka bynta ban pyntrei ïa ki saw tylli ki projek bording ba kynthup ïa ka Kynshi stage-I & II hydroelectric project na ka daw ka jingdon u mar Uranium.
U Bah Prestone u la ong ruh ba ka rai hadien ba kitei ki kompeni ki la pynpaw ba kim kwah shuh ban ïaid shakhmat ïa ka kam, watla don pat iwei ar tylli ki kompeni kiba dang pynpaw ïa ka jingsngewtynnad ban bteng ïa katei ka projek.
U la pynkynmaw ruh ba ha u snem 2007, la soi ïa ka MoU bad ki kompeni shimet hynrei tad haduh mynta pat ym don kawei ruh ka projek kaba la soi ha kito ki por ba kan seisoh ne paw kam.
“Kumta, dang shen ha ka review meeting bad bun na ki, ngi la pyndam noh ïa ka projek namar kam don jingmut shuh,” u la bynrap biang.
Halor ka jingkylli, u Symbud Myntri Rangbah u la ong ruh ba ha ka por ba ki soi ïa ka MoU bad ki kompeni shimet kadei ka kamram jong ki ban peit namar na ka liang ka sorkar ka khlem pynlut ei ei bad kumta ka jingduh kadei ïa ki hi.
“Kumta na ka liang ka sorkar kam don satia kano kano ka jingduhnong ha ka liang ka pisa hynrei kaba ktah kadei tang ka por, ha ka jaka ban ai sha ki kompeni kiba lah ban trei lane sha ki public undertaking jong ka sorkar kiba kwah ban trei lane kiba lah ban pynurlong ïa katei ka projek ha ka jylla Meghalaya.”
