Yn ïateh paralok ka NEHU bad ki University na Mauritius ban pynkhlaiñ ïa ka jingpule

Shillong, Jylliew 8 : Ka North Eastern Hill University (NEHU) kan ïateh paralok bad ki University na Mauritius na ka bynta ban pynkhlaiñ shuh shuh ïa ka jingpule ym tang hapoh ri hynrei wat shabar ri ruh.
Da ka jingthrang ban pynkhlaiñ ïa ka jingpule naduh ka kolshor, ki jingwad bniah bad ki jingwad ïa kiba dang thymmai ka NEHU kala ïateh paralok bad ki ri ASEAN, QUAD, Pacific Rim bad mynta kan pynïar shuh shuh ïa ka jingiadei da kaba pynkhreh ban ïateh lok bad ka Mauritius.
U Prof P.S SHukla, Vice Chancellor jognka NEHU u la leit sha ka High Commission jongka Mauritius ha India bad ïa kynduh ia ka High Commisioner ka Santi Bai Hanooman bad ki secretary jongka ban ïakren halor kane ka jingkwah ban ïateh paralok bad ki University jongka Mauritius da kaba ïasoi ruh ïa ka Memorandum of Understanding (MoU).
Na ka liang ka Santi Bai kala pynpaw ba kan ai ka jingkyrshan ba pura ban wanrah ka jingïadei hapdeng ka NEHU bad ki Univerisity jongka Mauritius ban ïoh pule bniah shuh shuh halor ka jingkylla ka suiñ bneng, hydrology, ka kolshor, ki rukom im tynrai, ka ktien, ka thoh ka tar, ki kam ïada ri bad ter ter. Lyngba ka MoU yn ïateh ruh ban don ka jingleit ïa pule mar kylliang ki samla pule na NEHU bad kumjuh ruh ki samla pule na Mauritius.
Na ka liang ka Santi Bai ka la pynpaw ruh ïa ka jingthrang jongka ban wan ïuh kjat sha NEHU. Halor kane u Prof Shukla ula pynpaw ïa ka jingkloi ban pdiang ïa kane ka jingkwah jong kane ka nonglamktien ka India sha katei ka ri. Kane ka jingwan jongka High Commissioner jongka Maritius sha kane ka jylla bad khamtam sha NEHU kan long ka jingsdang jong ka jingïadei hapdeng ka NEHU bad ka Mauritius. Kane kan long ruh ka jingmyntoi ïa ka ophis ba thymmai jongka NEHU kaba dei tang ïa ki kam bar ri ne International Affairs kaba la sdang hadien ba la shimti da une u Vice Chancellor ba mynta u P.S Shukla.