Yn ïasoi soskular ka Sorkar Jylla bad ki 12 hajar ki longïing ba shna ïing be-aiñ ha W’nagar

Shillong, Jylliew 28 : Ka sorkar jylla ka la rai ban ithuh bad ïasoi sokular noh bad ki 12,000 tylli ki long ïing kiba la thaw ïing beaiñ ha ka jaka sorkar ha ki ar tylli ki dong ha Williamnagar, ha Balsrigittim bad Warinagre, East Garo Hills.
U Myntri Rangbah ka jylla u Conrad K Sangma ula ïathuh ba ka sorkar kan sa ithuh noh ïakitei ki jaka jongka ba la thaw ïing beaiñ da kitei ki briew da kaba pyntreikam ïa ka rai kaba rim kaba naduh u snem 2002-2003.
Ha u 2002-2003 ka Kynhun Myntri ka la rai ban ithuh noh ïa kitei ki jaka jongka da kaba kan ïasoi soskular noh bad kitei kiba thaw ïing beaiñ khnang ba ka jaka kan dei beit jongka sorkar bad yn shu ïasoi bad da kaba ai wai bun phew snem ba kin sah. Hynrei naduh katei ka por ym shym la pyntreikam haduh mynta.
“ Na kane ka daw mynta ka sngi ka kynhun myntri ka la shim ïa ka rai ban pyntreikam noh ïa ka rai kaba mynshwa kata ban ithuh ïa ki jaka jongka ha Balsrigittim bad Warinagre ha kaba kumba 1200 tylli ki long ïing kiba la thaw ïing beaiñ ha kine ki jaka sorkar. Ha kane ka jingïasoi yn sa ïa pynbeit ban long kum ka jingai wai ïa ki bun phew snem katba ka jinglong trai ïa ka jaka kan dei beit ka sorkar” ong u Myntri Rangbah.
U la ïathuh ba la buh ruh kawei kawei ka long ïing kan ïoh 10,000 Sq.ft ka jaka bad ïa ka dor yn pynshong nongrim kat kum ka dor jaka ba la buh da ka GHADC. Ha Warinagre ka jaka ba kham sor ka dor ka long 2.50 shi bigha bad ha Balsrigittim ka sorkar kan long 1.86 shi bigha bad yn shim ruh ïa ka baiwai pat ba man u bnai ruh.
ïa kane la leh na ka bynta ka jingbit jingbiang jong baroh namar ba la jur palat sa tang ki jingïaleh mukotduma ha ki por jong ki sorkar ba mynshwa bad kumta khnang ba kine kin ym ïai bteng donkam ban thaw da ki lad ban ïasngewthuh jingmut lang.
U la ïathuh ba ka sorkar kan ïoh khajna 8 klur shisien ïoh bad 2.67 klur man la u snem bad na Balsrigittim bad na Warinagre ka khajna 4.5 klur shisien ïoh bad 1 klur man la u snem pat.