SHILLONG, Jylliew 12: Ka Meghalaya Wushu Association [MWA] ka la sei ïa 12 ngut ki nongïalehkai shynrang bad kynthei ki ban mihkhmat ïa ka Meghalaya sha ka rynsai ïakop jong ka 34th Senior National Wushu Championship ka ban long ha Indoor Hall University ha Hyderabad naduh ka 14 tarik haduh 19 tarik Jylliew, 2025.
ïa kane ka kynhun yn ïalam da u Bah Niawki Iakai, uba long u NS NIS Wushu Coach jong ka MWA na Iooksi, West Jaintia Hills District.
Shuwa ba kane ka kynhun kan mih na MSMA headquarter, Laitkor Kynton-U-Mon, Shillong, Meghalaya ban leit ïashim bynta sha katei ka Championship la ïoh ban pynlong ïa ka jingïalang kaba kyrpang ban kitbok kit rwiang ïa ki khynnah ïalehkai.
Ha kane ka prokram na ka liang jong u President ka Meghalaya Wushu Association (MWA) u Bah Donny R.Ranee u la kitbok kitrwiang ïa kane ka kynhun ba kan lehkai bha bad ba kan nang trei shitom shuh shuh na ka bynta baroh.
U la pyntip sha ki ba ma ki ryngkat bad ki nongïalehkai Junior Wushu kiba la shah jied ki ban sa ïashim bynta ha ka lympung ïalehkai ba 24th Junior National Wushu Championship 2025 ha Hyderabad, ba ha u bnai Naitung ban wan yn pynrung ïa ki ha ka kynhun Team Preparation Wushu ban pynkhreh na ka bynta ka 39th National Games ka ban wan ka ban long hapoh Jylla ha u snem 2027.
U la kyrpad ïa ki bor ba dei peit na ka tnad ïalehkai ka Meghalaya ban sngewbha ban thung 2 (ar) ngut ki NS NIS qualified Coach na ka jylla ha ka tnad ïalehkai kum ka jingdonkam jong ka por khnang ba kin lah ban pynkhreh ïa ka kynhun ïalehkai Wushu jong ka Meghalaya na ka bynta ka 39th National Games 2027.
Ki kyrteng jong ki nongïalehkai ki ban ïashim bynta ki long: Espiranza S.Songthiang, Banika Myrboh, Mandi Wankhar, Riwot Lyngdoh, Lamphrang Kharsahnoh, Ebenezer Tang, Pyrshangbanjop Kharmudai, Mebanpaia Wankhar, Banjoplang Ryndem, Kyrshanbor Romeo Songthiang, Glorin Ingty, Nehtre Pdein.
