Shillong, Jylliew 02: Ka kynhun kaba don 28-ngut ki rangïalehkai phutbol U-20 jong ka Meghalaya kin mih na Shillong mynta ka sngi ban leit sha France na ka bynta ka prokram ai jinghikai lane ka Elite Training Camp kaba 20-sngi. Kane ka prokram kan sdang naduh ka 05 tarik haduh 25 tarik Jylliew ha Olympique Lyonnais’ Academy, France.
Kumta na ka liang jong ka tnad Sports ka la pynlong ïa ka jingïalang kaba kyrpang (Send-Off Prokram) na bynta ki rangïalehkai bad hynñiew ngut ki official ha ka 02 tarik jylliew, 2025 (sngi Nyngkong) ha kaba la wan K;ongsan da u Myntri Rangbah ka Jylla u Conrad K Sangma.
Haba ai jingkren sha ka kynhun ïalehkai kaba don 28 ngut, u Myntri Rangbah ka Jylla, u Conrad K Sangma, u la ong ba ka Meghalaya ka don ïa ka kabu kaba khraw ha ka jingkhlaiñ jong ka jingbun ki samla bad ba ka sorkar ka pyrshang ban pyndonkam ïa kane ka sap da kaba bei tyngka ha ki prokram bapher bapher ban kyntiew bad saiñdur ïa ki samla.
Haba pyntip ba ka jinglut jingsep baroh kawei na bynta kane ka prokram la antad ba kan kot haduh T.2.8 klur, u Myntri Rangbah u la ong ba kam shym la pynthut ne pynartatien ïa u wat tang khyndiat da kaba bynrap, “Kane kam dei ka jingpynlut hynrei ka jingbei tyngka”.
“Lada don napdeng jong phi kiba ïoh ban rung sha ka ISL ha ki por ban wan, phin sa lah ban ïoh biang ïa ka jingbei tyngka kaba ngi la bei ha uwei pa uwei na phi ha kane ka prokram kaba kyrpang tang ha kawei ka samoi jong ka ISL bad kane ka dei kaba Nga ïohi ïa ka jingtreikam baroh kawei ban phah ïa kane ka kynhun sha ka prokram pyntbit kaba 20 sngi ha Lyon France te ka long ka jingbei tyngka ïa ki samla bad ka jingbei tyngka ïa ka lawei na ka bynta ka jylla Meghalaya.”
U Myntri Rangbah u la pynpaw ruh ba ka Jylla hadien khyndiat snem kan sa don kumba sanphew tylli ki madan artificial turf ryngkat ka madan phutbol kaba heh tam ha ka ri.
“La ka long ha ka bor briew ne ka jingkyntiew bor ïa ki nongïalehkai ne ki jingtei kum ki stadium bad ki football turf ne ka jingkyrshan ïa ki klob phutbol bad ki Association bapher bapher ka dei ka bynta jong ka jingïohi jngai kaba ïar kaba Ngi don na ka bynta ka lawei jong ki samla bad ka jylla jong Ngi,” u la ong.
Haba ïakren bad ki nongïalehkai ki ban sa shim bynta ha katei ka prokram ai jinghikai, u la kyntu ïa ki ban shimkhia ïa ka kabu bad ban ïai bteng ban pynleit jingmut. “Man la ka khyllipmat ba phi don hangtei pynkynmaw ïalade ïa kane ka kabu kaba phi ïoh bad shim ïa ka ban ïoh jinghikai, ban mad bad ban ïasam bad ban ïoh mynsiem bad pynshlur ban trei shitom na ka bynta kaba bha tam,” u la ong.
Kiba la donlang ha kane ka sngi ki kynthup ïa u Richard Yangtham, IAS,Joint Secretary, Sports and Youth Affairs, Saloni Verma, IAS, Executive Director, MBMA, u Bah Hamlet Dohling-President jong ka Meghalaya Football Association, u D.D Shira-Director Sports and Youth Affairs nalor kiwei.
ïa ka kynhun na ka bynta ka training camp ban wan ha Lyon la lum bad thaw da ka jingïatreilang jong ka tnad Sports bad ka Meghalaya Football Association.
Shuwa kane, ka kynhun ka la ïaid lyngba ïa ka Coaching Camp kaba bñiah bha la shibnai tam ba la pynlong ha SSA Stadium, ha ryngkat kane la thaw ïa ka kynhun kaba la ïashim bynta ruh ha ka U20 Nationals ha Chattisgarh ha kaba ka Jylla ka la ïalehkai bha ban rung sha ka semi final shuwa ba kan khyllem noh. ïa kane ka kynhun yn ïalam da u rangapdien, u Rimankhraw Kharumnuid kum u Kapten.
Lah ban kdew ba kane ka training camp shabar ri ha Lyon kaba la pynlong da ka Indo French Sports Association kan wanrah ïa ka jingshemphang bad jingmyntoi bad ban ïoh mad ïa shibun ki kabu kumjuh ruh ka buit ïalehkai phutbol kaba bun jait ha ka pyrthei.
Ka kynhun ïalehkai jong ka Meghalaya:
Babitlang Wahlang, Jovialstar L Lyngkhoi, Meshanbanjop Sumer, Badondor Marbaniang, Richborn Kharpuri, Bipiush G Marak, Arkini Laloo, Pynshailang L Nonglait, Pynkmenlang Marbaniang, Rimankhraw Kharumnuid (C), Nickyboy Swer, Pyrkhatshaphrang Sumer, Dawansalanmi Malang, Easter Salchang Ch Sangma, Franky Dkhar, Chibaitki Pamthied, Riborlang L Lyngkhoi, Banlam Kupar Rynjah, Banpliebok Khongjoh, Mebannangkiew Thabah, RT Hanson Pdang, Saindur Rynjah, Ricky Kharkongor, Mebanlamlynti Masharing, Deibormame Tongper, Emanbha Marbaniang, Pasborlang Khonglikong, Kenneth W Jyrwa
Ki official jong ka Meghalaya: Sunesh Syiem (manager), Bobby L Nongbet (head coach), Khlain Pyrkhat Syiemlieh (assistant coach), Jeffrey Warlarpih (assistant coach), Iaikyntiewlang Nongkynrih (assistant coach), Lucky Mary Marbaniang (physio), Rupamon Nongbet (doctor)
