Yn ïashim bynta 27 ngut ki thei ïalehkai kickboxing ka jylla ha ka Khelo India Asmita league ha Siliguri

SHILLONG, Rymphang 27: Ka kynhun ki nongïalehkai kickboxing ki kynthei jong ka jylla Meghalaya kaba don 27 ngut hapoh ka lama jong ka Meghalaya State Kickboxing Association (MSKA) ka la wanpoi ha Siliguri, West Bengal ban ïashim bynta ha ka Khelo India Asmita Kickboxing League 2025-26.
Kane ka lympung ka la sdang naduh ka 26 tarik Rymphang bad kan kut ha ka 01 tarik Lber 2026. ïa ka kynhun yn ïalam da ar ngut ki nongïalehkai kiba la ïoh kyrdan International Kickboxer, kata u Nathaniel P Kurkalang na Mylliem Mawrie bad ka Ibadarishisha Mukhim na Lower Lumparing Lumdorbar.
Ka kynhun ka kynthup ïa ki nongïalehkai na kylleng ki District hapoh ka jylla; ba kynthup na East Khasi Hills, Eastern West Khasi Hills, South West Khasi Hills, West Jaintia Hills. Ki katto katne ki kyrteng ba pawkhmat ha ka kynhun ki long ka Daniella I Wanda Mylliemngap, Medariphyla Lyngdoh Nongbri bad ka Belldona Pakyntein.
Ha ka jingïalang kitbok kitrwiang ba lyngkot, ki nongïalehkai ki la pynpaw ïa ka jingsngew skhem ba ha kane ka kynti ruh kin wanrah ïa shibun ki takma bad lehse kan kham palat ruh ban ïa kaei kaba ka kynhun ka la jop ha ka Indian Open International Kickboxing Tournament kaba la long ha ka 04 tarik u Rymphang 2026.
Kane ka Tournament ha kaba ki nongïalehkai jong ki 11 tylli ki Jylla ka thaiñ Mihngi ki ïashim bynta ha kawei ka rynsan ban ïohrung sha ka Khelo India Asmita Kickboxing Women’s National League 2025-26 ka ban long ha Chennai Tamilnadu naduh ka 26 – 29 tarik Lber 2026.