Yn ïarap ka sorkar pdeng ïa ki tymmen ba 70 snem shaneng da ka skhim ba kyrpang ha ka koit ka khiah

New Delhi Nailur 12 : Ka Kynhun Myntri jong ka sorkar pdeng ba la khlieh da u Myntri Rangbah duh u Narendra Modi, ka la mynjur ïa ka jingai jingïarap ha ka koit ka khiah ïa baroh ki nongshong shnong kiba la don 70 snem shaneng khlem da peit ïa ka jingkamai hapoh ka skhim ba kyrpang ka Ayushman Bharat Pradhan Mantri Jan Arogya Yojana (AB PM-JAY).
Ka jingthmu kalong ban ai jingmyntoi ïa 4.5 klur ki longïing bad 6 klur ki riewtymmen bad kin ïoh ei ka health insurance kaba 5 lak tyngka katkum ka longïing. Da kane ka jingmynjur, baroh ki riewtymmen kiba la don 70 snem shaneng khlem da peit ïa ka jinglong ka ïoh ka kot bad ka imlang sahlang kin ïoh ïa ki jingmyntoi jong ka AB PM- JAY. Ki riewtymmen kiba dei ban ïoh ïa kane ka jingmyntoi kin ïoh ïa kawei ka card ba thymmai hapoh ka AB PM-JAY. Ki riewtymmen kiba la don 70 snem shaneng kiba dei na ki longïing kiba la don lypa hapoh ka AB PM-JAY kin ïoh sa ka top-up haduh T. 5 lak shi snem na ka bynta jong ki (ka bym donkam ban ïasam bad kiwei kiwei ki dkhot jong ka longïing kiba dang hapoh ka 70 snem ka rta). Baroh ki riewtymmen kiba la don 70 snem shaneng kin ïoh ïa ka jingïarap haduh T. 5 lak shi snem katkum ka longïing. Ki riewtymmen kiba la don 70 snem shaneng kiba la ïoh ïa ki jingmyntoi jong kiwei kiwei ki skhim health insurance kum ka Central Government Health Scheme (CGHS), Ex-Servicemen Contributory Health Scheme (ECHS), Ayushman Central Armed Police Force (CAPF) ki lah ban jied ïa ka skhim ba ki la don lypa lane ki lah ban jied ïa ka ABPMJAY. La pynshai ba ki riewtymmen kiba la don 70 snem shaneng kiba don ïa ki health insurance policy shimet lane ka skhim Employees’ State Insurance ki lah ban ïoh ïa ki jingmyntoi hapoh ka AB PM-JAY.
Ka AB PM-JAY kadei ka skhim health insurance paidbah kaba heh tam ha pyrthei kaba ai jingïarap ha ka koit ka khiah kaba long T. 5 lak kawei ka longïing ha ka shisnem na ka bynta ka jingsumar ha ki hospital na ka bynta 55 klur ngut ki briew na 12.34 klur tylli ki longïing.
Baroh ki dkhot jong ki longïing kiba ïoh ïa kane khlem da peit ïa ka rta la kynthup hapoh ka skhim. Ka skhim ka la peit ïa 7.37 klur ki jingsumar ha ki hospital kynthup 49 percent ki longkmie kiba ïoh ïa kane ka jingmyntoi. Ki paidbah ki la ïoh jingmyntoi haduh palat T. 1 lak klur hapoh kane ka skhim.
ïa ka jingpynïar ban kynthup ïa ki riewtymmen kiba la don 70 snem shaneng la pynbna nyngkong da u Myntri Rangbah duh Narendra Modi ha u Iaiong 2024.
Ka skhim AB PM-JAY ka la sakhi ka jingbteng ban pynïar ïa ka jingdon ki briew kiba lah ban ïoh jingmyntoi. Nyngkong, 10.74 klur ki longïing ba duk bad ba duna ka ïoh ka kot ba kynthup 40% ki briew ba shem jynjar duh ha India ki dei kiba la kynthup hapoh ka skhim.
Hadien kane, ka Sorkar India, ha u Kyllalyngkot 2022 ka la pynthymmai ïa ka jingioh bynta
hapoh ka AB PM-JAY na ka 10.74 klur sha ka 12 klur ki longïing da kaba ithuh ka jingkiew kaba 11.7% ka jingdon ki briew ha India man ka shiphew snem haba ïanujor bad ka jingdon briew ha India ha u snem 2011. La pyniar shuh shuh ïa ka skhim ban kynthup 37 lak ki nongtrei ASHA/AWW/AWH ha kylleng ka ri bad kiba haïing jong ki ban ïoh ei ïa ki jingmyntoi ha ka jingïoh jingsumar. Da kaba rah shaphrang ïa kane ka thong, Ka AB PM- JAY mynta kan ai ei ïa ki jingïoh jingsumar ba T. 5 lak sha baroh ki nongshong shnong kiba la don 70 snem shaneng ha kylleng ka ri.