Yn ïap noh ka MRSS Amendment Bill 2020 hadien ba pynphai ka Home Ministry sha u Lat

Shillong, Kyllalyngkot 3 : Ka Meghalaya Residents Safety and Security (Amendment ) Bill 2020 kan iap ne duh noh hadien ba ka Home Ministry ka pynphai ïa katei ka aiñ sha ka sorkar jylla ryngkat ki jingai jingmut ban wanrah ki jingpynkylla ha ki katto katne ki kyndon namar ki ïa tyngkhuh bad ki aiñ ba la don lypa jongka sorkar pdeng.
Kitei ki kyndon kiba ïa tyngkhuh hadien ba la wanrah ki jingpynkylla ha ki katto katne ki kyndon jongka MRSSA 2016 ki dei kum ka jingbuh ïa kita ki khyrdop ban rung bad mih na ka jylla kiba dei ki jaka ban talasi ïa ki kot ki sla jong kiba wan rung sha ka jylla bad ïa kiba mih na ka jylla.
Kat kum ka jingïathuh jong u Symbud Myntri Rangbah ka jylla u bah Prestone Tyngsong kane ka jingwanrah jingpynkylla ïa ka kyndon aiñ MRSSA 2016 ban don noh kitei ki khyrdop ban rung (Entry) bad mih (Exit) ka dei namar mynshwa kim don satia ha ka aiñ.
“ Hynrei haba la don ba ujor ïa kane ka aiñ ha ka ïing bishar ka ïing bishar ka la pynduh noh ïa kitei ki kyndon bad kumta na kata ka daw la wanrah ïa kane ka MRSS Amendment Bill 2020” ong u bah Prestone da kaba ïathuh ba u Lat pat ha kato ka por u Tathagata Roy u la phah pat ïa kane ka Amendment Bills sha ka sorkar pdeng kata sha ka Ministyry of Home Affairs. Ka MHA hadien ba ka la bishar ka la pynphai ïa kane ka Bill ryngkat ki jingai jingmut ban thaw da kiwei pat ki kyndon kiba lait ban ïa tyngkhuh bad ki kyndon aiñ jongka sorkar pdeng. Hooid ban da ka jylla jongngi ka long kum ka Manipur ba ka leit ka wan ka kut beit tang ha katei ka jylla bad lait ban ïaid lyngba kumba long mynta haba leit sha Assam, Barak Valley, Tripura, Mizoram,lehse ïa kane ka bill ladep ban soi. Hynrei namar ba ka ïa tyngkhuh bad ki aiñ ka sorkar pdeng kumta la bthah ban wanrah ki jingpynkylla” ong biang u Symbud Myntri Rangbah.
“Kumta haba kane ka bill kam ïoh ka jingsoi pynskhem na u Lat ka la shu iap la ka iap ne duh la ka duh noh” ong u Symbud Myntri Ramngbah.
U la ïathuh kumba long mynta la pyntreikam beit da ka MRSSA 2016 kaba phai khmat beit tang sha ki nongshongwai bad kam don satia kita ki kyndon ban buh ïa ka khyrdop ban talasi ïa kiba rung bad mih na ka jylla. Nalor kata wat ka ïing bishar ruh ka la pynduh noh ïa kane ka kyndon ba la buh da ka sorkar ban plie ïa kitei ki khyrdop.
U la ong shuh shuh ba ka sorkar ha ka jingïalam jong u Dr Mukul Sangma ka la leh bakla namar ka pynrung ïa kine ki kyntien Entry bad Exit tang ha ki kyndon aiñ (Rules) ym ha kata ka Ain Rew (Principal Act). Kane ka jingleh bakla ka la wanrah ka jingduh nong kaba khraw khamtam ka suk ruh ban khring ban kiew ïinglieh ïingsaw.
“ Kumta wat la pyntreikam ïa kane ka MRSSA 2016 ruh kam long ka aiñ kaba khlaiñ la dei ban jer kyrteng ïa ka kum ka Tenants Bill namar ka phai khmat tang sha ki nongshong wai. Ki bor synshar mynshwa ki thmu ban ïalam bakla ïa ki paidbah da kaba shu kynthup ïa kitei ki kyntien Extry and Exit tang ha ki aiñ ba la shna na ka Ain Rew katba ha ka aiñ rew pat kitei ki kyntien kim don” ong u bah Prestone.