Shillong, Naitung 01 : Ka jingïaseng ïasyllok ki pastor jong ka KJP Synod Sepngi lyngba ka Organising Committee Charitable Football Friendly Match ka la pyntip ba kan sa pynlong ka jingïalehkai paralok hapdeng ki pastor bad ki ophisar sorkar ïa kaba la phiah ha la ki jong ki zone. Ka jingthmu ban pynlong ïa jingïalehkai paralok ka long shi bynta ka jingrakhe ïa ka jingdap 100 snem jong ka Dr. H. Gordon Roberts Hospital ïa kaba yn plie pyrda ïa ka jingrakhe ha u Naiwieng mynta u snem kaban pynkut pat ha u Naiwieng 2023.
U Pastor JR Thabah uba dei u Secretary ka Committee haba pynbna ïa kane ha ka sngi Thohdieng ha Shillong Press Club u la ïathuh ba ka jingthmu ban pynlong ïa ka jingïalehkai paralok ka long ruh shi bynta ban pynmih pisa ban tei sa ïa kawei pat ka Robert Hospital kaba thymmai kaba don marjan bad kaba rim ïa kaba la ai kyrteng ka Dr. H. Gordon Roberts Hospital Annexe ïa kaba yn tei san mala nangta ban kyntiew kyrdan noh ïa ka school of Nursing sha ka College of Nursing.
U la ïathuh ba ïa ka jingïalehkai paralok yn sdang noh ha ka 6 tarik Naitung ha Nongstoiñ, ha Mawkyrwat Zone yn pynlong ha ka 23 tarik Nailar, ha Ri-Bhoi District yn pynlong ha Umroi ha ka 17 tarik Nailur, 26 tarik Nailur ha Mairang Zone ban sa pynlong ha Pyndemumïong, nangta ha Sohra bad khatduh yn pynlong ha Nongbah Shillong ha Madan Heh, Mawlai ha ka 22 tarik Risaw.
Ka Committee ka kyntu ïa ki ophisar ba kin wan ban ïashim bynta lang ha kine ki jingïalehkai parlok. U la ong ruh ba ka committee ka la pynkhreh ruh ki donors card bad kyntu ruh ïa ki paidbah ban ïasnoh ktilang ban ïarap ïa ka hospital da kaba ïarap ban don bynta lang ha kane ka prokram.
U Bah KW Marbañiang uba dei u Administative Officer jong ka Roberts Hospital u la ïathuh ba ïa ka Dr. H. Gordon Roberts Hospital la plie paidbah ha ka 25 tarik Lber 1922 bad ha ka 25 tarik Lber 2022 ka la dap pura 100 snem hynrei ym shym la ïoh ban rakhe na ka daw ka jingpynthut jong ka khlam COVID-19 ïa kaba la rah noh ban plie pyrda ïa ka jingrakhe ha ka 4 tarik Naiwieng 2022.
“Ngi la dei ban rakhe ïa ka jingdap 100 snem ha 25 tarik Lber 2022 hynrei na ka jingdon jong ka khlam Covid na ka liang ka hospital governing board ryngkat ka jingmynjur lang jong ka KJP Sydon Sepngi ngi la pynkynriah noh ïa ka jingrakhe plie pyrda ha ka 4 tarik Naiwieng 2022 bad yn pynkut ha ka 3 tarik Naiwieng 2023.”
