Shillong, Jymmang 13: Ka PFR Football Academy ha kane ka sngi U Blei kan leit ban ïalehkai paralok pyrshah ïa ka Kaziranga Football Academy ka ban long ha Jawahalal Nehru Stadium Guwahati na ka bynta ka Under 11, Under 13 bad Under 15 naduh ka por 11 baje mynstep.
Ka jingïalehkai hala ïing jong ka PFR Football Academy pyrshah ïa ka Kaziranga Football Academy ka la long ha ka 9 tarik Ïaïong 2022 ha madan MFA Ground Shillong.
Ka jing thmu jong ka Academy ban leit ïashimbynta ha ki lympung lane ki jingïalehkai paralok shabar ka jylla kalong ban kyntiew ïa ka rukom ïalehkai jong ki khynnah, ba ki khynnah kin sngewthuh bad kin mad kumno ki long haba ki ïakynduh bad ki kynhun kiba nabar jong ka jylla bad kumjuh ban ai mynsiem ïa ki khynnah ban shim ïa kane ka jingïalehkai kum ka jingim ha ka lawei ka jong ki.
Naka liang jong ka Academy mynta ka dang don ruh hapdeng ka jing ïakren bad kiwei kiwei ki Club shabar ka jylla na ka bynta ka jingïalehkai paralok ha une u bnai u ban wan, kumta ka Academy ka kyrmen ruh lyngba kine ki sienjam kan sa lah ban sei ïa ki khlur ïalehkai nangne na ka jylla.
