Shillong, Jymmang 03 : U Myntri ka tnad C&RD ka sorkar jylla, Bah Hamlet Dohling un ïalam hi dalade ïa ka synjuk jong ki trok kit maw kit shyiap ban kynduh ïa ki bor sorkar khamtam eh ïa ka tnad pulit halor ka jingeh ba ki mad ban ïoh rung shapoh ka nongbah ha ka por mynsngi ban leit pynhap mar.
Ïa kane u Myntri u la pynpaw ha ka jingïalang jong ki trok kit mar kaba long ha kane ka sngi Saitjaiñ ha Mylliem ha kaba la wan shim bynta da ki trok kamai (407 bad 909) na kylleng ki jaka.
Katei ka kynhun kaba tip kum ka Local Trucks Association (LTA) kadei ka synjuk kaba kynthup naduh ki trok kamai ba dei na ka thaiñ Mylliem, thaiñ Mawmaram, Mawngap, Mawjrong, Smit, Mawblei, Laitkor bad kiwei kiwei.
Ïa katei ka kynhun kaba lamkhmat da u Bah Hamlet hi kum u nongaibuit, nangta u Bah T Khar-ir kum u President la thaw da ka thong ba kin ïoh ban pynsngew biang markhmat bad ki bor sorkar halor ka jingsyrtok palat ka kamai kajih namar ki ïoh ban kit mar tang shisien shisngi na ka daw ka jingpyrkhing ban ïoh rung sha sor ha ka por mynsngi.
Katkum ka jingïathuh da u Bah Jiben Kharkongor, lada ki leit ban kit mar naduh mynstep hynrei haba poi ha 7mer pat ki shah bat haduh 8 baje janmiet ka ba mut ki hap ban ap da ki bun bun kynta hangtei. “Don ki shnong ki bym shah ban pynhap maw ne shyiap ha ka por mynmiet kumta ngi hap ban sah noh ha kato ka jaka bad pynhap pat haduh mynstep,” u la ong.
Na ka liang u MLA haba kren ha kane ka sngi, u la ong ba kum u nongmihkhmat bad kum u Myntri un sa shim ïa ka jingkitkhlieh ban ïa kynduh ïa ki heh pulit ryngkat ka jingdonlang ki nongïalam jong ka Association ban wad ki lad ki lynti ban weng noh ïa katei ka jingeh ba ki kynduh ha ka kamai kajih.
