Shillong, Naitung 06 : Ka National People’s Party (NPP) ka la bynshet ha ka MDC ba la jop bunsien na Nongshken constituency, Kong Grace Kharpuri ban shimti kum ka President ba thymmai jong ki longkmie NPP lane ka NPP Women’s Front.
Ïa ka Kong Grace la jied ha ka jingïalang jong NPP Meghalaya kaba long ha kane ka sngi Saitjain ha ophis treikam jong ka party ha kaba baroh ki la phai khmat ban bynshet noh ha kane ka longkmie ban shimti ïa kane ka kam.
Kane ka jingpynthymmai ïa ki nongkitkam jong ka Women’s Front ka long ruh kum shi bynta ban pynkhlaiñ shuh shuh ïa ka jingtreikam jong ka party nangne shakhmat watla ka elekshon 2028 ka dang jngai.
Ha kane ka jingïalang la donlang naduh ki nongïalam ba hakhmat jong ka party hapoh ka jingïalam jong u Working President Bah Hamletson Dohling, nangta Bah HM Shangpliang ba dei u nongai ktien ka party, Bah Ransom Sutnga bad kumjuh ruh ka jingdonlang ki nongkitkam ba hakhmat jong ki longkmie NPP nalor kiwei kiwei ki nongïalam ka party.
Kumban shu kdew hangne, ka Kong Grace Kharpuri ka la jop ban ban haduh saw sien kum ka MDC jong ka Nongshken constituency khlem pat shah rem wat tang shisien ruh naduh ba ka mih ban aireng. Kane ka longkmie wat hadien ba ka mad ïa ka jingshah rem salit ha ka elekshon MLA ha u 2023 hynrei ka la jop donburom pat ha ka elekshon MDC kaba dang shu lah shen mynta u snem.
Mynta, kum ka Nongïalam jong ki sawngut ki MDC ka NPP ha KHADC, ka Kong Grace ka la dei ruh kawei na ki nongmihkhmat ba la jop bun eh ha KHADC.
