Shillong, Jymmang 09: Ka Sorkar Meghalaya shen kan sa ïakynduh bad ka Sorkar Assam ban pan jingiatreilang ha ka ban ïakhun pyrshah ïa ka kam khaii tuh ïa ki masi sha Ri Bangladesh.
Ka Sorkar Meghalaya kala rai ruh ban sa lum ïa ka jingïalang bad ki shipai Border Security Force (BSF) bad ka Tnad Pulit ka Jylla ban pynkhlaiñ ïa ka jingtalasi ïa ki kali ba kit masi hapoh ka Jylla khamtam ha ki jaka khappud.
Ïa kane la pyntip da u Myntri ka Tnad Animal Husbandry & Veterinary Bah Sanbor Shullai haba ïakren bad ki lad pathai khubor hadien ka jingïakynduh ïa ka seng ki Nongotdoh masi bad Nongotdoh sniang hynne ka janmiet.
U bah Sanbor ula ong ba ka daw jong ka jingkiew dor jong ka doh masi ha Jylla ka dei namar ka jingjur ka jing khaii tuh ïa u masi sha Ri Bangladesh, kaba la pynkyrduh masi hapoh ka Jylla.
“Ngi la rai ba shen ngin sa iashong jingïalang hapdeng ka Sorkar Meghalaya bad Assam ban iasyllok kumno ban lah tehlakam noh ïa kane ka kam bymman” ula ong.
Haba bynrap, u Principal Secretary ka Tnad u GHP Raju ula pyntip ba ka Tnad Animal Husbandry and Veterinary na ka por sha ka por ka ju shong jingïalang bad ki BSF, ki Custom bad ki Pulit ban ïakhun pyrshah ïa kane ka kam bymman kaba la ktah ïa u paid nongshongshnong ka Jylla.
Nalor kane, u pyntip ba ka Tnad kala pynieng ïa ki Check Post ha 6 tylli ki jaka ban talasi ïa ki kali ba kit masi bad ban pynshisha ïa ki Transit Permit khnang ban nym ailad ïa ki briew ba khaii tuh ba kin wan pynpoi masi na Assam.
Kine ki Check Post ki dei kiba la pynieng ha Umling Entry Point, ha Jirang, Umkiang, Bajengdoba, Trikikilla bad Aradonga.
Haba pyntip ïa ki daw ka jingpynieng ïa ki check post, u Raju u pyntip ba ka Tnad kala pyntreikam ïa ka Transit Pass ban ai sha ki nongkhaii masi ba dei na ka bynta ban otdoh hynrei sngewsih ban tip ba ki Nongkhaii tuh kila shna thok ïa ki Transit Pass ban ïoh khaii tuh ïa ki masi sha Bangladesh”.
Kat kum ka jingong jong u, ka jingpyntreikam ïa ka TP ka long ban pynsuk ïa ki nongkhaii masi shoh doh ba kin lait na ki jingeh haba wanrah ïa ki masi na shabar ka Jylla kum na West Bengal, Bihar, Andhra Pradesh bad kiwei kiwei.
“Ïa ki Transit Pass ngi ju ai haduh 3 sngi-4 sngi ha ka shitaiew ban pynsuk ïa ki nongkhaii kata ruh ngi ai ei ïa ki TP. Hynrei ki nongkhaii tuh ki dang nud ban shna thok bad wanrah ïa ki masi lyngba ka Assam. Ngim pat satia kumno ki ïoh wanrah ïa ki masi bad shano ba ki siew pisa. Kane ka dei ka kam bymman” ula ong.
U Raju u ong ba dei kane ka daw kaba pynlong ïa ka Tnad ban pynieng ïa ki check post ki ban treikam shuwa mynta tang kum ka jingpyrshang ba shipor ïa kaba yn sa shong bishar biang ban nang pynjanai ïa ka jingtreikam jong ki.
