SHILLONG, Nailar 19: Ka Madan S&CC kan sa ïoh ban aireng pyrshah ïa ka Umrynjah SC ha ka final jong ka lympung phutbol Under-20 Fourth Division 2024 ba la pynïaid da ka Shillong Sports Association hadien ba ka la pynliem noh ïa ka Madanryting SC lyngba ka tie-breaker ha ka Semi final, ha ka Lah Sngi U Blei, ha SSA Ground, Polo.
Kumban shu kdew, nalor ka Umrynjah SC bad ka Umïew U Sam, baroh ar tylli ki kynhun ba ïakhun ha kane ka Semi final kaba ar ki ladep pynthikna lypa ïalade ban ïoh ïakhun ha ka kyrdan 3rd Division ha ka samoi ban wan hadien ba ki la poi sha ka wat ïakhun semi final, namar katkum ki kyndon jong ka Fourth Division ka SSA, baroh saw kynhun kiba poi semi final kin shah kyntiew kyrdan ha ka Third Division.
Haba phai sha ka jingïalehkai, hapdeng ka Madanryting SC bad ka Madan S&CC, lah ban ong ba ka jingïalehkai ka la long kaba itynnat bad kaba ïakhaid. Haduh kaba kut jong ka por ba la buh ki la ïakhaid da mar 1 kol kaba la pynlong ïa ki ban jam sha ka extra time.
Wat hadien ba la pyndep ïa ka extra time ym shym la don satia ba lah ban pynïakhlad ïa ki naba ka jingïakhun ka la ïakhaid biang hynrei mynta pat ka long da mar 3 – 3 kol. Dei tad ynda la jam sha ka tie breaker ba ka Madan S&CC ka la lah ban jop da 4-2 ïa ka Madanryting SC.
Da kane ka namjop, ka Madan S&CC kan pynkhreh mynta sa ïa ka wat ïakhun ba khadduh, ha ka final pyrshah ïa ka Umrynjah SC kaba la pynliem noh ïa ka Umïew U Sam ha ka semi final kaba nyngkong. Ka final kan long ha ka 24 tarik mynta u Nailar, 2024 ha SSA Ground, Polo.
