Shillong, Naiwieng 09: Ka Na Rympei Football Academy bad ka Jakrem SC ki la pynskhem ïa ka jaka jong ki ha ka phainal jong ka Meghalaya Women’s State League 2025, ka ban sa long ha ka 12 tarik Naiwieng, da kaba jop ïa la ki jong ki jingïakhun semi final ha ka sngi Saitjaiñ.
Ka Jakrem ka la pynliem noh ïa ka Laitkor SC da 2-1 kol ha ka jingïakhun kaba la long ha SSA Stadium, katba ka Na Rympei ka la jop pyrshah ïa ka Pay For Right Football Academy da 4-1 ha SAI NEHU.
Baroh ar tylli ki resol ki long kaei kaei kaba pynkyndit namar ba ka Laitkor (na ka Shillong Sports Association) ka la long ka kynhun kaba khlaiñ bad kaba khlem shah rem shuwa ka semi final, ha kaba ka la jop lut ïa baroh ki jingïalehkai group stage. Katba ka Jakrem (Mawkyrwat District Sports Association), ka la wan kyrdan ba-ar ha ka Group B.
Ka PFR (Shillong SA) bad ka Na Rympei (Ri-Bhoi DSA) ki la ïakynduh teng ha ka group stage ha ka 06 tarik Risaw, ha kaba ka PFR ka la jop da 2-1 kol. Baroh ar kidei kiba la shah kynthup ha ka Group A.
Hynrei haba ïakynduh biang ha ka semi final, ka Na Rympei ka la iehnoh shadien ïa ka jingïalehkai ba ladep ban pynjemkhnap ïa ka PFR. Ka Pynhun Shulet (15′, 48′) bad ka Tracy Rympei (50′, 88′) kaba la khur ïa ka nam Player of the Match ki la pynkhihjar na ka bynta ka Na Rympei. Ka Nisilia Majaw (73’) ka la thep shi kol na bynta ka PFR.
Ha ka semi final kaba la long ha SSA Stadium, ka nongthep kol kaba kynsai jong ka Laitkor, ka Iaraplang Nongrum ka la khanglad ha ki nongïalehkai ba shadien ba skhem jong ka Jakrem.
Ha kaba khatduh dei ka Inrila-i-dor Khongthaw (28′) kaba la pynkhihjar nyngkong na ka bynta ka Laitkor shuwa ba ka Sunalinda Iawren (55′) kaba la khur ïa ka nam Player of the Match kan pynïakhaid bad ka Iaphisha Marbaniang (90′) ka la thep ïa ka namtam ha ka minit ba khatduh shuwa ban kut.
