Yn ïaknieh nam lahduh ka Mawsyiem bad ka Shillong Sixers ha ka SCA Cricket League 3rd Division 2026
SHILLONG, Kyllalyngkot 21: Ka Mawsyiem CC bad ka Shillong Sixers ki la pynthikna ïa ka jaka ha ka phainal jong ka lympung Shillong Cricket League 3rd Division 2026 ba la pynïaid da ka Shillong Cricket Association da kaba jop ïa la ki jong ki jingïakhun semi final hynne ka sngi Balang.
Ka Mawsyiem CC ka la jop da 24 ron ïa ka Youngstar CC ha ka semi final kaba nyngkong, katba ka Shillong Sixers ka la pynliem da kaba suk haduh 128 ron ïa ka Ages.
Haba phai sha ki jingïalehkai, hadien ba jop ïa ka jingkynting pisa (toss) ka Mawsyiem ka la kam trai ban tied nyngkong, ha kaba ka la lah ban tied pyndep ïa ki 20 ober ban buh ïa ka thong kaba 154 ron bad khyllem 4 wiket.
Kiba la lamkhmat ha ka tied ki long u Malcolm Syiemlieh (51 ron naki 40 bol) bad u Pynshngain M Umlong (22 ron naki 15 bol). Napdeng ki rangkawang bol jong ka Youngstar, kiba la seisoh ha ka boling dei u Ricky (2/24 naki 4 ober) bad u Prateek Kumar Rajak (1/23 naki 4 ober).
Hynrei haba pyrshang jubab ka Youngstar ka la shah pynkut noh tang na ka bynta 130 ron naba lap ba kut ki 20 ober, da kaba khyllem sa 9 wiket. Na ka liang jong u Prateek Kumar Rajak, u la noh synñiang 32 ron naki 23 bol, katba u Suraj Chettri u la kamai 26 ron naki 34 bol.
U Settle Diengdoh u la long uba seisoh tam napdeng ki nongkawang bol jong ka Mawsyiem, da kaba khur 4 wiket naki 4 ober da kaba ailad tang 20 ron, kaba la pynlong ïa u ban khur ïa ka khusnam Player of the Match.
Ha ka semi final kaba bud, ka Shillong Sixers ka la buh ïa ka thong haduh 232 ron bad khyllem 6 wiket haki 20 ober. Ki nongtied kiba kongsan ki long u Amir Sheikh (75 ron naki 31 bol) bad u Gufran Ahmed (27 ron naki 11 bol).
Nangta ki nongkawang bol jong ka Shillong Sixers ki la pyndep ïa la ka jong ka kamram da kaba weng lut ïa baroh 10 wiket jong ka Ages tang na ka bynta 104 ron haki 20 ober. Kiba la kham pawkhmat ha ka tied u dei u Drabest Marak (38 ron naki 27 bol) bad u Roger (21 ron naki 9 bol).
U Evert Mawlong (3.2 ober; ailad tang 20 ron) bad u Sandeep Roy (4 ober; ailad 25 ron) jong ka Shillong Sixers, ki la ïoh ban khur mar 3 wiket kaba la pynthikna ïa ka jingjop kaba khraw da 128 ron. Ha kaba kut ïa ka khusnam Player of the Match la khur da u Amir Sheikh uba la kamai 75 ron ha ka tied.