Yn ïaknieh nam lahduh ka Mawkasiang bad ka Mawlynrei ha ka SSA U-20 4th Division 2025

Shillong, Nailar 07: Ka kol kaba la thep da u Kyrmen Mukhim ha ka minit kaba 60 ka la pynïakhlad ïa ka jingïakhun semi final kaba ar bad kaba khatduh jong ka lympung U-20 Fourth Division Football League 2025 ba la pynïaid da ka Shillong Sports Association ha madan First Ground-SSA Stadium, Polo, ha kaba ka Mawkasiang SC ka la jop da 1-0 kol ïa ka Lummawbah SC hynne ka sngi Palei ban buh jaka ha ka phainal.
Kumta ka Mawkasiang SC kan aireng pyrshah ïa ka Mawlynrei SC ban ïaknieh ïa ka nam lahduh. Ka Mawlynrei ka la jop ïa ka Lapalang ha ka semifinal kaba nyngkong ha ka sngi Balang.
Lah ban kdew ba kane ka jingïakhun hapdeng ka Mawkasiang SC bad ka Lummawbah SC ka dei kawei na ki jingïalehkai kaba itynnat tam ha ki jingïakhun Fourth Division mynta u snem.
Ka jingïakhun ka long kaba ïaryngkat bor ha kaba baroh arliang ki la ïoh mar katjuh ki kabu ba thikna ban pynkhihjar.
U Kyrmen u la ïoh ban thep ïa katei ka namtam ha ka khyllipmat ba ki rangïalehkai ka Lummawbah ki dang pyrkhat ba ka la dei ka offside, hynrei ka jingmareh jong u ka la biang por bha shuwa ba un thep lyngba u rangapkol ka Lummawbah ban buh hakhmat ïa ka Mawkasiang.
Hadien ba shah thep ka Lummawbah ka la nang pynkhlaiñ shuh shuh ïa ka rukom ïalehkai jong ka hynrei kam shym la lah ban pynurlong ïa ka jingthmu.
Ban shu pynkynmaw saw tylli ki kynhun kiba la poi shaduh ka semi final ki la dep ban pynthikna ïa ka jingkiew kyrdan sha ka lympung Third Division ha ka samoi ban wan.
ïa ka jingïakhun na ka bynta ka nam lahduh hapdeng ka Mawkasiang SC bad ka Mawlynrei SC la buh ban pynlong ha ka 16 tarik Nailar.