Jowai, Ïaïong 05: Ka Lion Y&SA kala rung sha ka Final hadien ba la pynrem ïaka West Jaiñtia Police CC da 27 run haka jingïakhun Semi Final ba ar kaba la pynlong ha ka sngi Saitjaiñ (04-04-2026), haka lympung District Cricket League 2026 bala pynïaid da ka West Jaiñtia Hills District Cricket Association, Jowai.
Hadien ba jop ïa ka toss, ka Lion Y&SA ka la jied ban tied nyngkong bad ka la kamai 190 run na ki 34.2 over bad hap lut baroh ki wicket. Ki nongtied kiba la kamai bun run ki long u Nick Dann – 66 run (58 bol) bad u Deibormi Rngad (C) – 50 run (65 bol). Katba ki nongkawang bol jong ka West Jaiñtia Police CC kiba la ïoh ban pynhap Wicket ki long u MS Bishal 3 wicket, u Devention Lyngdoh, Kenny Wann bad u Monjur kila ïoh khur mar 2 wicket.
Haka inning ba ar, ka West Jaiñtia Police CC kala tied 163 run ha ki 30.2 over, hynrei ka la duna 28 run ban kynjoh ïa ka thong bad hap lut baroh ki wicket. Ki nongtied jong ka kiba kamai run khambun ki long u Obadaia Bareh – 56 run (54 bol) bad u Kenny Wann – 25 run (32 bol). Katba ki nongkawang bol ka Lion Y&SA kiba la ïoh Wicket ki long u Peterson Lamare – 5 wicket, u Noon-daystar Pohrmen bad Deibormi Rngad kila ïoh khur mar 2 wicket.
Ïa ka nam Man of the Match la ïohrah da u Peterson Lamare jong ka Lion Y&SA.
La pyntip ka jingïakhun Final Match kan long ha-pdeng ka Lion Y&SA kan ïa-khun pyrshah ïaka Goodwill Mupliang SC ka ban long ha ka 07-04-2026 ha Khliehtyrshi Mini Stadium ha ka por 9 baje mynstep.
Ha kane ka sngi yn wan sakhi ruh da u ma Wailadmiki Shylla (MLA, Minister of Sports & Youth Affairs, Govt. of Meghalaya) kum u kongsan, katba u ma Medling Swer (MDC, Executive Member, JHADC) kum u Symbood Kongsan.
Na ka liang ka West Jaiñtia Hills District Cricket Association, ka khot ïa baroh kiba ieid bad sngewtynnad ban peit Cricket ban wa sakhi ïa kane ka sngi.
