SHILLONG, Kyllalyngkot 20: Ka kynhun ki thei ïalehkai jong ka Laitkor SC bad ka Lumparing SC ki la pynjlan ïa ka jingïakhun jong ki sha ka phainal ha ka lympung Women’s Football League 2026 jong ka Shillong Sports Association (SSA) hadien ba ki la mih kum ki nongjop ha ki jingïakhun Semi final kiba la long hynne ka sngi Ba-ar, ha madan First Ground-SSA Stadium, Polo.
Ka Laitkor ka la pynthikna ïa ka jaka da kaba pynliem noh da 2-0 kol ïa ka Pay For Right Football Academy watla ka la ïalehkai pyndep da tang 10 ngut hadien ba ïoh red card noh kawei ka thei ïalehkai, nangta ha ka semi final kaba bud, ka Lumparing ka la jop da 4-2 kol pyrshah ïa ka Rangdajied United FC.
Ka Iaraplang Nongrum (34 & 68’) ka la pynskhem ïa ka jingkyrmen jong ka Laitkor ban poi sha ka phainal kaba saw sien lynter ha ka SSA Women’s League da kaba pynkhihjar ha baroh ar kylla ha kane ka jingïakhun.
Ka Iaraplang ka la pynkhih ïa ka kol kaba nyngkong ha ka minit kaba 34 ban pynlong ïa ka Laitkor ba kan pynkut ïa ka kylla step da kaba lamkhmat da 1 kol. Nangta hadien shi kynta tam ba la ïaid ka por ka la thep ïa ka kol kaba ar ban pynjlan ar shah ïa ka kol lamkhmat.
Ha ka semi final kaba bud, la ïohi ïa ka Lumparing kaba la lamkhmat da ar kol ha ka kylla step lyngba ka Marbarin Nongrum (32′) bad ka Pynhun Shulet (37′). Bad tang hadien katto katne ba la jam sha ka kylla kaba ar, ka Pynhun (48’) ka la thep sa kawei ka kol ban pynjlan ïa ka jinglamkhmat da 3-0 kol.
Hynrei ki thei ïalehkai ka Rangdajied kim shym la kynran dien bad ïoh ban pynphai kawei ka kol lyngba ka Eiladki Ksoo (49′) shuwa ba ka Bahunlang Synrem (50′) kan thep ïa ka kol kaba saw na ka bynta ka Lumparing. Ka Ibadaaihun Nongsiej (83′) ka la pynkhih ïa ka jar kaba khatduh na ka bynta ka Rangdajied shuwa ba ka kynhun kan mad ïa ka nam rem da 4-2 kol.
Hadien kane ka jingjop kaba sah mynta ïa ka Laitkor SC bad ka Lumparing SC kadei satang ka phainal, kaba la buh ban long ha ka 24 tarik mynta u Kyllalyngkot ha ka por 1 baje mynsngi. Baroh arliang kin kyrmen ïa ka jingjop, ha kaba ka Laitkor SC kan ïakhun ban rah ar sien lynter ïa ka nam lahduh, katba ka Lumparing kan khmihlynti ïa ka khusnam lahduh kaba nyngkong.
