Jowai, Nohprah 18: Ka kynhun ïalehkai jong ka Amlarem SC bad ka Lamin XI kila ïoh ban rung sha ka Final ha ka lympung Super Division Amlarem Football League 2025 bala pynïaid da ka Amlarem Sub-Divisional Sports Association (ASSA), ha madan phutbol ka Jaraiñ West Jaiñtia Hills District.
Haba phai sha ka jingïakhun 2nd Semi Final mynta ka sngi 18 tarik ka kynhun jong ka Lamin XI kala lah ban pynliem da 4-2 kol ïa ka Sohlawiat SC da ka jingïashut Tie-Breaker.
Hashwa ban poi ka jingïashut Tie Breaker kine ki ar kynhun kila ïakhaid da mar shikol, ïa ka shikol na ka Sohlawiat SC la ïoh ban pynkhih jar nyngkong haka minit kaba 5 lyngba u Wantijune Buam.
Ka Lamin XI kala pyrshang katba lah ban pynphai kylla ïa katei ka shikol bad dei haka minit ba 67 jong ka kylla miet kala ïoh ban thep ïa ka kol lyngba u Fredy Gayang bad tad haduh ba kut jong ka Extra Time kila ïakhaid da mar 1-1 kol.
Lyngba kane ka jingjop ka Lamin XI kan sa ïoh ban pynkhreh ban ïakhun ïa ka Final pyrshah ïaka Amlarem Social Club ka ban long haka (22/12/2025) haka por 1 baje nohphai sngi.
