Khliehriat, Risaw 12: Ka lympung ïalehkai phutbol jong ka kyrdan 3rd Division bala pynïaid da ka East Jaiñtia Hills District Football Association kaba la long ha ka sngi Saitjaiñ (12 tarik u Risaw) ha madan EJDSA Artificial Turf, Diengshynrum, Khliehriat.
Haba phai sha ka jingïakhun Semi Final ba nyngkong ha katei ka sngi, la sakhi ïa ka Lumshnong YWSC kaba la pynliem noh da 3-0 kol ïa ka Moopyniein SCSO ban rung sha ka final.
Ka Lumshnong YWSC ka la ïoh ban lamkhmat shi kol ha ka kylla step lyngba u Misting Lamin (36 minit).
Tang mar ïa sdang ka kylla step u Skhemborlang Rupai (47 minit) u la ïoh ban pynkhih sa ïa ka kol kaba ar na bynta ka Lumshnong YWSC, bad nangta u Amorous Lyngdoh u la pynthikna ïa ka namjop da kaba thep ïa ka kol kaba lai haka 80 minit.
Haba phai pat sha ka Semi Final kaba ar, ka kynhun ïalehkai jong ka Dkhiah West SC kala pynliem da 1-0 kol ïa ka Tuber Kmaishnong CSC.
ïa kane ka namtam la thep da u Dawrupaia Tlang ha ka (extra time) jong ka minit ba 84 kaba la biang pura ïa ka Dkhiah West SC ban khur ïa ka namjop.
Kumta ka Lumshnong YWSC bad ka Dkhiah West kin long ki ar kynhun ban ïaknieh ïa ka namlahduh ha ka phutbol 3rd Division mynta u snem jong ka East Jaiñtia Hills District Football Association.
