Shillong, Nohprah 05 : Ka Congress mynta ka pynkhreh ban ïakhun hi marwei khlem da ïateh lok badno badno ruhha kane ka elekshon MDC kaba lah ban long noh shen ha u snem ban wan.
Na ka liang u Working President ka Congress, Bah Pynshngaiñ N Syiem haba kren bad ki lad pathai khubor u la ong, “Kan ym don kano ka jingïateh lok bad kino kino ki party ha kane ka elekshon bad ngi pynkhreh ruh ban ïakhun lut baroh 29 tylli ki constituency.”
Tangba u ong pat ba ha shwa ba kin pynbna ïa ka thup kyrteng jong ki kyrtong kin peit shwa ïa ki kyrtong ba ki Block ki phah ha shwa ban shim ïa ka rai kaba khatduh.
“Ngi ïohi hadien ba ka VPP ka la pynbna ïa ki kyrtong MDC, ki la mih bun ki kyrtong kiba kynsai kiba phai khmat mynta sha ka Congress kum kawei na ki party kaba hakhmat eh,” u la ong.
Kumta, u ong ba na kine ki dak kiba paw ka pyni ba ka Party ka la long kaba pynkhreh na ka bynta ban sei kyrtong lut na baroh ki constituency.
