Shillong, Jylliew 14 : U President ka BJP Meghalaya, u Rikman G Momin ha ka sngi Saitjain u la ongba ka party kan mih ban ïakhun lang na ka bynta ban dawa ïa ka Inner Line Permit na ka sorkar pdeng khnang ban ïoh pyntreikam noh ïa ka ha ka jylla.
Haba kren bad ki lad pathai khubor, u President u la ong, “Ka party kan ym kynran dien hynrei ngin ïaid lang ryngkat ryngkat bad ka jingdawa jong ki paidbah.”
Katkum ka jingïathuh jong u, ka party ka la rah ruh ïa kane ka mat jingdawa bad ka sorkar pdeng.
Na ka liang u General Secretary jong ka party Bah Wankitbok Pohshna u la ong ba Iing Dorbar Thawain ka jylla ka la dep ban mynjur da ka Resolution ban kyntu ïa ka sorkar pdeng na ka bynta ban pyntreikam noh ïa ka ILP ha ka jylla.
“Ngi dang buddien ïa ka kumta ha kaba kut ka rai ka sah ha ka sorkar pdeng ban rai kumno ban leh hynrei kumba ka long mynta na ka party ngim pat lah ban ong ei ei kane,” u la ong.
Haba kylli, u Bah Wankitbok Pohshna u la ong, “Ngam don jingtip eiei shaphang kata (haba ïadei bad ka jingbym pat jubab ka sorkar halor ka ILP).”
Haba kren pat halor ka jingtur kyrthlep ki nongwan ki mynder ban buhai shnong beain, u general secretary ka party u la ong ba ka donkam ïa ka sorkar ban thaw ïa ka kynhun tohkit ba kyrpang (SIT) na ka bynta ban lap bad pynphai noh ïa ki nong Bangladesh sha ka jaka ba ki wan.
“Ngi dang pyrshang ban ïakynduh bad u Myntri Rangbah ban pynsngewthuh ïa u ba dei ban shim khia mardor bad ban thaw ïa ka SIT khnang ban lap shim ïa ki sienjam kiba donkam na ka bynta ban beh noh ïa ki nongwan rung be-aiñ,” u la ong.
Shuh shuh u la ong ba na rilum Garo ruh ka la don ka jingai jingmut ba la dep ban aiti sha u Myntri Rangbah bad kumjuh ruh sha u Myntri Kam Pohïing halor kane ka mat.
