Yn ïakhun ki 6 kynhun ba kynsai tam jong ka SPL ha ka Shillong Super Cup ba thymmai

Shillong, Jymmang 22: Mynta u snem ka Shillong Sports Association ka la pynbna ba kan wanrah da ka lympung kaba thymmai kaba la ai kyrteng da ka Shillong Super Cup ha kaba hynriew tylli ki kynhun kiba kynsai tam ha ka lympung ïalehkai jong ka Shillong Premier League 2025 kin ïoh ban rung sha kane ka lympung, ka ban long ha ka rukom ïalehkai knockout.
Ka lahduh bad ka kynhun ba wan ba-ar ha ka SPL 2025 kin rung beit beit sha ka semifinal hynrei ki kynhun kiba wan ha ka kyrdan kaba lai haduh kaba hynriew kin hap ban ïaid lyngba shuwa ki jingïalehkai playoff. Nangta ki nongjop kin ïakynduh ïa ka kynhun ba nyngkong (1) bad ba-ar (2) ha ka semi final, nangta ka final ha kaba kut.
Ha kaba ïadei bad ka Shillong Premier League, mynta u snem kan don ka jingkylla kaba khraw ha ka rukom pynïalehkai (format), ha kaba ïa kane ka lympung kaba ha khlieh duh jong ka Shillong Sports Association yn pynduna noh sha ka single leg league, kaba mut ba ki klob kin ïakynduh tang shi sien ïa kawei pat.
Ka la don ka jingsngew ba ka SPL 2024 ka long kaba jrong palat ha u snem ba ladep, ha kaba 90 tylli ki jingïakhun la pynïalehkai tang hapdeng 10 tylli ki klob. Mynta u snem kin don tang 45 tylli ki jingïalehkai, ha kaba ïa ka lahduh yn rai ha kaba kut jong ka league stage.
Kumban shu pynkynmaw ka SPL 2023 ruh ka la ha ka single leg format ryngkat ka semifinal bad ka final. Hynrei mynta ka kynti kan nym don ka jingïakhun playoff ha u snem 2025, ha kaba ka kynhun kaba wan ha khlieh duh ha kaba kut jong ka league kan long ka lahduh.
ïa kine ki jingkylla la pynpaw ha ka jingïalang bad ki nongthoh khubor ba la khot da ka SSA hynne ka sngi Palei.
Ka Tournament Committee jong ka SSA ka la rai ruh ba yn shah tang arngut ki bym dei ki trai jylla Meghalaya ha kano kano ka kynhun ba sdang jong ka klob.
Ka SPL 2025 kan sdang ha u Naitung, katkum ka kalendar ïalehkai jong ka SSA na ka bynta kane ka samoi. Ki klob jong ka SPL mynta u snem ki kynthup ïa ka lahduh kaba bat ïa ka burom, ka Shillong Lajong, nangta ka Mawlai, Rangdajied United, Nangkiew Irat, Laitkor, Langsning, Nongrim Hills, Sawmer, Malki bad ka Mylliem (ki ar tylli ki kynhun ba khatduh kidei ba dang shu kiew kyrdan na ka First Division).
Ka jingsdang kham kloi (ka lympung jong u snem ba la dep ka la sdang ha u bnai Risaw) bad ka rukom ïalehkai (format) kaba kham lyngkot kan ïarap ban nym ïatyngkhuh bad ka National Football Championship na ka bynta ka Santosh Trophy bad ka Meghalaya State League.
Na ka liang jong u General Secretary ka SSA u Bah Dipshon L Nongbri u la ai ka jingkhublei kaba kyrpang ïa u Myntri Rangbah ka jylla u Conrad K Sangma bad ïa ka sorkar jong u kaba la ai ka jingkyrshan ïa ka synjuk ha kaba ïadei bad ka jingkyntiew ïa ka SSA Stadium kaba don ha First Ground ha Polo bad ryngkat bad ka jinglut jingsep jong ki kyrdan (division) bapher bapher.
Ha kajuh ka por, u Working President ka SSA u Bah Robert Dkhar u la kdew ïa ka Championship League kaba la thmu ban pynlong, ka ban pynïasoh lang ïa baroh ki lahduh na ki san tylli ki kyrdan ïalehkai jong ka SSA ha kawei ka lympung. ïa kane yn pynlong ha kano kano ka por ha u bnai Naiwieng.
Mynta u snem la thmu ruh ban pynlong ïa ka lympung phutbol jong ki kynthei kaba la tip da ka SSA’s Women’s Football League kumjuh ruh ïa ki lympung lehkai na ka bynta ki U-12, U-14 bad U-16 ha kaba kut jong u snem..
Ka aïom lehkai jong ka SSA na bynta u snem 2025 kan sdang naduh 02 tarik u Jylliew da kaba sdang ïa ka U-20 Fourth Division.