Jowai, Naiwieng 18: Ka lympung ïalehkai phutbol bala tip kum ka ‘Hajan Shylla Memorial Trophy 1st Division’ bala pynïaid daka Thadlaskeiñ Sports Association (TSA) West Jaiñtia Hills kala jam noh sha ka jingïakhun phainal ka ban long haka 24.11.2025 ha madan Wahiajer Multi-Sports Complex.
Haba phai sha ka jingïakhun 2nd Semi Final mynta ka sngi 18 tarik ka kynhun ïalehkai jong ka Nongkhroh Mawsiang kala lah ban pynliem da 5-1 kol ïaka Khliehtyrshi SC, ïa kitei ki kol na ka Nongkhroh Mawsiang la thep da u Snowel Kharsati haka minit ba 2 & 5 bad u Rio Myrboh haka minit ba 34, 36 & 44. Ïa ka shikol na ka Khliehtyrshi SC la thep da u Samehi Ryngkhlem haka minit ba 79.
Lyngba kane ka jingjop jong ka Nongkhroh Mawsiang kala ïoh ban rung syndon sha ka Final da kaba yn ïakhun pyrshah ïaka Larnai SC haka 24.11.2025 ha ka 24 tarik mynta u bnai.
