Jowai, Naiwieng 09: Ka lympung ïalehkai phutbol jong ka 8th Inter-Dong bala pynïaid da ka Seng Samla Khlachympa Sports and Cultural Club Nongtalang ka la nangïaid shakhmat bad mynta ka sngi saitjaiñ kala poi sha ka jingïalehkai Semi-Final ba ar hapdeng ka Banan Sport Club pyrshah ïa ka Amlariang Sport Club haka por 2 baje nohphai sngi.
Ha kane ka jingïakhun Semi-Final ka Banan SC kala pynliem ïa ka Amlariang SC da 6-2 kol.
Haba phai sha ka jingïalehkai ka long kaba itynnad bad hun ban peit hynrei ka Amlariang SC kam lah pat ban khang lad ïa ka jingtbit jong ki rangïalehkai jong ka Banan SC.
Ïa ki 6 goal jong Banan SC, la ïoh ban thep da u Tei Tariang 3 kol, u Joty Pohlong 1 kol, u Rimiky Mukhim 1 kol bad ïa ka 1 kol pat la kum thep bakla da u goalkeeper hi ka Amlariang SC (own goal), katba na ka Amlariang SC pat la ïoh ban thep kol da u Tyrmai Pohchen bad u Last Pohchen mar shi kol.
Ïa ka Namtam (Man of the match) la ïoh da u Tei Tariang jong ka Banan SC.
Na kane ka jingjop ka Banan SC kan sa ïakhun pyrshah ïa ka New Nonglamin SC haka Final jong ka Inter-dong mynta u snem bad ïa tarik un sa pynbna pat kham hadien.
