Shillong, Risaw 24 : U MLA ba marwei jongka Nationalist Congress Party (NCP) na Gambegre Constituency u Saleng Sangma u la rai ban dang ïaineh beit bad kane ka party ban ïakhun ia ka election 2023 namar u don ka jingthrang ban ïakhun ïa kane ka jingkyrduh kam kyrduh jam ki samla kaba la nang kiew na uwei u snem sha uwei pat u snem.
Haba ïakren bad ki lad pathai khubor u la ong “ Hooid ka ju long ka rukom ba ki riewsaiñ pyrthei ne wat ki MLA ruh ki pyrshang ban kynthih na kawei ka party sha kawei pat tang jan ka election. Kane ka long ïa baroh hi naduh kiba dang mut ban ïakhun nyngkong, ki MLA ba rim, ki MLA ba mynta hynrei ma nga pat haduh mynta nga dang don beit bad ka NCP”.
U la ong ba ka thong jong u kaba hakhmat eh ha kane ka election 2023 ka long halor kane ka jignkyrduh kam kyrduh jam ki samla, ka jinghiar ka pule puthi bad ka jingeh ki nongrep.U la ong ba kiba bun ki samla kiba la dep pyntbit ïaki jingpule jongki kim ïoh kam ïoh jam satia.
“ Kumta ngi hap ban phai khmat sha kine kumno ban wanrah ka jingkylla khnang ba ki khun samla kin ïoh kam ïoh jam hapoh ka jylla” ong u Saleng.
Lada ym lah ban peitngor naduh mynta halor ka jingïai kiew kiba pep skul shiteng por, ka lah ban buh ïa ka jylla ha ka jingma namar kiba bun kin im ha ka jingim kaba pyrshah ïa ka imlang ka sahlang bad leh ïa ki kam runar. “ Namar mynta ki samla ki kwah tang kumno ban lum spah kloi bad kumta lada kim don lad don lynti da kiwei kin leh da kino kino ki kam kiba pynthut wat ïa ka shongsuk shongsaiñ ka jylla ruh” ong u Saleng.
U la ong “ Lada phai sha kane ka juk mynta bun sa tang ki kam tuh kam thiem namar ba la shyrkhei u drok bad kumta tang ban ïoh pisa ban thied ïa u drok ki samla kim shlan ban leh ïa kano kano ka jait kam ruh. Phi ïohi katno ka jingtuid u drok sha ka jylla bad kine ki samla ba pep skul shiteng por kin sa ngop bad shah pynngop beit ha ki nongkhaïi drok”.
Kane ka jingkiew kiba pep skul shiteng por ka lah dei ka jingbym biang ki skul ne ka jinghap ïa khih ki nonghikai na ka por sha ka por ha surok ban ïoh ïa ki hok ba ki dei ban ïoh. Kumta ka pynjaituh noh ïaki khynnah skul ban leit skul haba ym don nonghikai, ong u Saleng.
