Nongpoh, Naitung 31: Kum kawei na ka jingïatei lang ban khanglad na ka jingpyndonkam ïa ki plastic kiba wan rah ym tang ïa ka jingpynjaboh ïa ka imlang ka sahlang bad ka ktah ruh wat ïa ka mei mariang, ka Nongpoh Town Committee ka la rai ban ai ka jingïatrei lang bad ka bor synshar District na ka bynta ban pynduh ïa ka jingpyndonkam plastic hapoh ka Nongpoh Town bad wat ha ka District hi baroh kawei.
Kane ka jingshim rai ka Nongpoh Town Committee ban ïa trei lang bad ka bor District na ka bynta ban pynduhjaid ïa ki jingpyndonkam ïa ki plastic, ka dei ruh hadien ba dang shen u Deputy Commissioner u la dep ruh ban pynjari da ka kyndon 144 CrPC na ka bynta ban khanglad ban dang pyndonkam ïa ki plastic hapoh ka District ba kane ka la ktah ïa ka khuid ka suba bad ka ktah ruh wat ïa ka mei mariang.
Haba ïa kren bad u Nongthoh Khubor, u Bah Rayonald Kharkamni, Secretary ka Nongpoh Town Committee, u la ong ba wat ka bor synshar District ki la phah da ka jingthoh ban pan ka jingïaitrei lang na ka bynta ban khanglad ban pynduh noh ïa ka jingpyndonkam plastic bad kum ka Town Committee ruh ka kloi ban ïa trei lang na ka bynta ka jingbha lang bad ruh khamtam ban ïada ïa ka mariang bad ban ïada na ka jingmih ki jaboh kiba bun ki dei na ki plastic.
“Ka la dei hi ka por ba ki paidbah ruh ki hap ban ai ka jingïatrei lang na ka bynta ban pynduh noh ïa kajingpyndonkam ïa ki plastic ba kane ka ktah shisha ïa ka khuid ka suba bad ruh ka pynjot ïa ka khyndew, kaba long ka jingma na ka bynta ka pateng ban sa wan” ong u Bah Rayonald Kharkamni, Secretary ka Nongpoh Town Committee.
Shuh shuh, u la ong ruh ba ka Nongpoh Town Committee ym tang ba kan ai ka jignïatrei lang bad ka bor district ha ka ban pynduh noh ïa ki jingpyndonkam ïa ki plastic, hynrei na ka liang ka town committee kan sa shim khia ruh ban pyntip sha broh ki nongïalam shnong ba hap hapoh ka town committee khnang ba kin shim lang kawei ka rai ban ïa trei lang bad ka bor district na ka bynta ban pynduhjaid noh ïa ka jingpyndonkam ïa ki plastic kiba long ka jingma na ka bynta ka khuid ka suba bad ka mei mariang.
