Mawkyrwat, Jymmang, 08: Ka lympung ïalehkai jong ka 1st Sngap Singh Syiem Football Tournament (SSSFT) 2022 ba la pynïaid da ka HYC Mawkyrwat Circle hapoh madan Artificial Turf (MDSA), South West Khasi Hills District, Mawkyrwat mynta ka sngi ka la poi sha kaba kut jong ka semi final ha kaba ka Nongbri (Nongjri) Football Team ka la pynliem noh da 4 – 1 kol ïa ka Khliehmawlieh Youth Club.
Haba phai ha ka jingïalehkai ha ka Semi Final ba khadduh mynta ka sngi, ka la long ka jingïalehkai kaba itynnad bha namar ban poi sha ka phainal ïa la ka kynhun, ki ‘rangïalehkai ki la hap ban ïa khun tyngeh da kaba ïoh ban thep bun kol. Kumta ha kane ka jingïalehkai na ka liang ka Nongbri (Nongjri) FT ka la ïalehkai bha ha kaba ka la ïoh ban thep ïa ka kol kaba nyngkong ha ka minit kaba 22 lyngba u Land Lynhuid bad ka kol kaba ar ha ka minit kaba 35 na u Shano Tariang. Ïa kitei ki ar tylli ki kol la ïoh ban thep ha ka jingïalehkai jong ka kyllastep.
Ha ka jingïalehkai jong ka kyllamiet pat, ka Nongbri (Nongjri) FT ka la ïoh biang sa kawei ka kol lyngba u Apbor Kurbah ha ka minit kaba 64 bad kumjuh ruh ha ka minit kaba 90+1 na u Kitbok Pale katba ïa ka shi kol jong ka Khliehmawlieh YC la ïoh ban thep ha ka minit kaba 78 na u Kmenlang Marthong. Kumta haduh ba kut jong ka jingïalehkai, ka Nongbri (Nongjri) FT ka la long ka nongjop ha kaba ka la tam noh da 4 – 1 kol pyrshah ïa ka Khliehmawlieh YC.
Namarkata, ka jingïakhun phainal ha kane ka 1st Sngap Singh Syiem Football Tournament (SSSFT) 2022 kan long ha ka 14 tarik u Jymmang, 2022 hapdeng ka Nongbri (Nongjri) FT bad ka Se-la-jong FT.
