Baroh ki paid nongshong shnong jongka jylla khamtam kito kiba leit jingleit man la ka por shabar ka jylla ki thrang dik dik ban poi kata ka por ban ïohi ba ki Liengsuiñ kiba heh kin lah ban hiar bad her na Kad Liengsuiñ, Shillong kaba ha Umroi.Kane ka dei ruh ka jingthrang jong ka sorkar bad kumta ngi ngeit skhem ba ka sorkar kan pynsted noh ïa ka kam khnang ban suk noh ka leit ka wan bad lait ka leit beh liengsuiñ na Guwahati.
Ha ka jingshisha na ka liang ka sorkar ka la dep ban shimkhia haba iadei bad ka jaka ka puta bad ki trai kiba die ïa ki jaka jongki na ka bynta ban pynheh ïa kane ka kad Liengsuiñ. Ka kam ka la ïaid shakhmat bad kumta la khmih lynti ba ka jingshna pynheh ïa ka surok ban her ki liengsuiñ ne ka Runway kan sdang noh. Na ka liang ka sorkar ka buh thong la kumno kumno ruh ban pyndep ïa kane ka kam hapoh u 2027 lada ym don kano kano ka jingpynwit ne pynthut. Ka jingpynheh ïa kane ka kad liengsuiñ ban ïoh hiar ki liengsuiñ kiba heh kan ïarap shuh shuh ïa ka jylla ha kiba bun ki liang naduh ka leit ka wan bad khamtam lei lei kan nang ïai khring ïa ki nongwan jngohkai sha ka jylla ba kin wan namar la suk ka leit ka wan ba la thikna ki liengsuiñ.
Kumba long mynta ym lah ban len kiba bun ki nongwan jngohkai sha ka jylla kiba wan da ki liengsuiñ ki dang hap hi ban leit ne wan na ka Kad Liengsuiñ Guwahati. Kane ka pynngiah ïa kiba bun kiba thmu ban wan sha kane ka nongbah, namar hap ban kem kali biang da kawei ban wan sha Meghalaya. Hynrei ynda la dep kane ka Kad Liengsuiñ jongka jylla na Umroi ha Shillong tang 45 minit ne shi kynta la poi lada ym don ka jingdheng kali. Ym tang ba ki nongwan jngohkai ki dang ïoh ban leit jngoh ïa ka nongbah Shillong hynrei lada ki kwah ban pynlut por ban pynjah thait ïa lade ha ki jaka sah jong ki ruh ka por ka dang bun ba kin ïoh. Hynrei lada wan na Guwahati la thait la jrem kat haduh ban da poi Shillong namar la kumno kumno ruh kan shim por beit kumba lai kynta ne haduh saw kynta ban poi haduh ha nongbah Shillong.
Ka jingpynheh ïa kane ka kad liengsuiñ ym tang ba kan pynsuk ïa ka leit ka wan hynrei kan kyntiew ruh ïa ka ïoh ka kot jong ka jylla namar tang shu la heh ki nongleit nongwan ruh ki la bun bad haba bun ki nongleit nongwan ki nongthied nongpet ïa ki tiar ki tar khamtam ïa ki tiar shna hi ruh kin bun namar kiba bun ki kwah ban rah sha ka jylla ban buh sah jingkynmaw. Nalor kata wat ki dukan die jingbam ruh kin ïaid ïew bha ynda la bun ki nongleit nongwan kine hi kin kyntiew ïa ka ïoh ka kot bad ka ïoh kam ïoh jam jong ki samla. Namar wat kiba kamai kali ruh ha kata ka por khlem pep kin bun bad kin im ja na kaba kit ïa ki nongleit nongwan na katei ka Kad Liengsuiñ. Namar wei ba la dep pynheh bad ïoh hiar ki kad liengsuiñ ba heh ka jingher ki liengsuiñ ruh kan ym long shuh tang shisien lane arsien ha ka shisngi hynrei lehse ha kata ka por kan long beit baroh 24 kynta kumba long kiwei kiwei ki kad liengsuiñ hapoh ka ri India.
Ynda la urlong kine baroh, kiban imja pahuh kin kiew na ka spah sha ka hajar bad phew hajar ngut namar tang ki kali ban kamai na kadliengsuin sha Shillong, Sohra, Jowai, Dawki, Nongstoin ne kiwei kiwei ki jaka kan long kaba jur bha namar kin hap ban bat beit da ki kali jong ki trai jylla ym shuh kumba long mynta kiba bun ne kumba palat mar shiteng na ki kali kiba wan sha Shillong bad sha kiwei ki jaka jngohkai pyrthei ki dei beit kiba shim na Guwahati, Assam.
Kane ka dei kata kaba ka sorkar ruh ka thrang kumba la ju pynpaw da ki Myntri bad ki Ophisar jongka sorkar na ka por sha ka por ba ki kwah ba ka Kad Liengsuiñ kan long kaba treikam baroh 24 kynta. Ah lano ngin ïohi ïa kata ka por ba ka Kad Liengsuiñ jongngi kan long kaba treikam khlem shogthait bad baroh baroh ngi ap khmih lynti ban poi kata ka por. Ban poi kata ka por ka shong ha ka jingpynsted jongka sorkar ïa ka kam bad kumjuh ruh ka Airport Authority of India (AAI). Donkam ka jingïatrei lang jong kine ki ar tylli ki tnad ba kane ka kam kan sted bad ïaid beit shakhmat tad haduh ban da ïohi ïa kita ki Liengsuiñ ba heh ban hiar bad her na Kad Liengsuiñ Shillong kaba ha Umroi.
